Европа Иттифоқи Россиядан олтин олиб киришни тақиқлашни муҳокама қилишга тайёр. Бу ҳақда Евроиттифоқ президенти Шарль Мишель Бавариянинг Эльмау қасрида бўлиб ўтган G7 саммити доирасидаги матбуот анжуманида маълум қилди, деб ёзади РБК.
«Биз кўриб чиқишга, ўрганишга тайёрмиз. Иқтисодиётимизга қандайдир зарар етказмасдан Россия иқтисодини нишонга олиш мумкинми ёки йўқлигини кўрамиз», — деди Мишель.
Унинг сўзларига кўра, бу вазифа Европа давлатлари учун умумий бўлиб, у Россия ҳукумати ва ҳарбий операцияларни молиялаштиришга зарба беришга мўлжалланган. Шарль Мишелнинг таъкидлашича, Европа Иттифоқи санкцияларни Европа ва унинг ҳамкорлари иқтисодига зарар етказмаслиги учун «мослаштириш ва аниқлаштириш»га ҳаракат қилмоқда.
Аввалроқ, 26 июнь куни АҚШ президенти Жо Байден ва Буюк Британия бош вазири Борис Жонсон Россия олтинини импорт қилишни тақиқлашини маълум қилган эди. Британия ҳукумати сўнгги ойларда ушбу қимматбаҳо металга Ғарб санкцияларининг молиявий оқибатларидан қочиш учун олтин қуймаларини сотиб олишга шошилаётган россиялик «олигархлар» орасида талаб борлигини таъкидлади.
«Бугун биз эълон қилган чоралар россиялик олигархларга тўғридан-тўғри зарба беради ва Путиннинг уруш машинасининг марказига зарба беради. [Владимир] Путин камайиб бораётган ресурсларини бу бемаъни ва ваҳший урушга беҳуда сарфламоқда», — деди Борис Жонсон.
Тақиқ янги металл қазиб олиш учун татбиқ этилади, у илгари Россиядан экспорт қилинган олтинга таъсир қилмайди. Лондоннинг ишонтиришича, чора-тадбирлар киритилгунга қадар қонуний равишда сотиб олинган Россия олтинига нисбатан санкцияларни кенгайтириш режалаштирилмаган.
Россия дунёдаги энг йирик олтин экспортчиларидан биридир. РФ Молия вазирлиги маълумотларига кўра, Россия олтин қазиб олувчи компаниялар ўтган йили 346,4 тонна олтин ишлаб чиқарган. РБКнинг «ФТС» статистик маълумотларига таяниб маълум қилишича, қазиб олинган металлнинг катта қисми (302,2 тонна, қарийб 87%) хорижга етказиб берилган, бу эса 17,4 млрд доллар даромад келтирган.
Украинада уруш бошланганидан бери олтин котировкалари унция учун 2050 долларгача кўтарилди ва сўнгги ойларда қимматбаҳо металл 1800−1850 доллар атрофида сотилмоқда. Россиядан олтин импортини чеклаш нархларнинг ошишига олиб келиши мумкин.
2021 йилда Ўзбекистон хорижга 4,1 млрд долларлик олтин сотди, бу мамлакат умумий экспортининг 24,7 фоизини ташкил этади. Январь-март ойларида олтин экспорти, асосан МДҲдан ташқари давлатларга, 2,9 млрд долларни ташкил этди. Бу даврда жами экспортнинг 51,5 фоизи олтинга тўғри келди.
Олтин нархининг юқорилиги Ўзбекистон учун фойдали. ХВЖ бунинг натижасида Ўзбекистон пандемия даврини нисбатан хавфсиз тарзда енгиб ўтганини таъкидлади.
