«Олимпик» футбол клубининг умумий бошқаруви МОҚ раиси ўринбосари Сакен Полатовга топширилмоқда, дея хабар берди Миллий олимпия қўмитаси матбуот хизмати.
Париж-2024 ёзги Олимпия ўйинларига йўлланма олиш мақсадида ташкил этилган «Олимпик» футбол клубига фаолиятини янада кучайтириш, олдинга қўйилган вазифаларни пухта амалга ошириш йўлида клубга янги раҳбар МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов тайинлангани айтилди.
У клубнинг президенти сифатида жамоанинг умумий бошқарувини юритади.
Сакен Полатов 1975 йилда Тошкентда туғилган. Олий маълумотли. Бунгача у «Локомотив» футбол клубига раҳбарлик қилиб келаётган эди. 15 июнь куни «Локомотив» клуби матбуот хизмати Сервер Жепаровнинг клуб спорт директори этиб тайинланганини маълум қилди.
У «темирйўлчилар» билан 3 бор мамлакат чемпионлигини (2016, 2017, 2018) қўлга киритган. Шунингдек, яна 3 марта Ўзбекистон кубоги (2014, 2017, 2018) баҳсларида ғалаба қозонган. Жамоа унинг бошқарувида 2016 йил Осиё чемпионлар лигасида чорак финалгача етиб борган.
