Сешанба куни Сурхондарё вилояти Сариосиё туманида жойлашган Тўпаланг сув омборидан сув чиқиб кетаётгани акс этган видеолар тарқалди. ФВВ ушбу ҳолатга изоҳ берди.

Қайд этилишича, 22 июнь куни соат 08:14ларда Тўпаланг сув омборидан чиқаётган сув кескин кўтарилган. Натижада амалдаги сув ташламаси режавий 70 метр куб секунддан 2022 йил 22 июнь куни хозирга вақтда 110 метр куб секундни ташкил этмоқда.

ФВВнинг хабарига кўра, Тўпаланг ГЭС сув омбор лойиҳаси қуввати 400 млн метр куб, амалда эса 378,87 млн метр кубни ташкил этмоқда.

«Сув омборининг мустахкамлигига зиён етмаган, айни вақтда чиқарилаётган сув ҳажмини камайтириш ишлари олиб борилмоқда», — дейилади хабарда.

«Газета.uz» мухбирининг сўзларига кўра, видеода кўринаётган бино бу ГЭСнинг эски иншооти бўлиб, 2021 йилдан бери бу ерда янги агрегатларни ўрнатиш ишлари олиб борилмоқда. Агрегатларга омбордан тушувчи сув йўли эса ёпиб қўйилганди. Видеолардан эса айнан ушбу бинодан сув чиқаётганини кўриш мумкин.

Мазкур ҳолатга «Ўзбекгидроэнерго» матбуот хизмати ҳам муносабат билдирди. Унда таъкидланишича, Тўпаланг сув омбори тўғони сув қўйиб юборгани ва атрофни сув босганлиги ҳақидаги хабарлар асоссиз (фейк) ва ҳавотирга ўрин йўқ.

«Ҳозирда Тўпаланг сув омбори қошида барпо этилган Тўпаланг ГЭСда 2-компонент модернизация лойиҳаси амалга оширилаётганлиги муносабати билан босимли қувурда синов ишлари ўтказилган вақтда босим қувури тўсини орқали 40 метр куб сув чиққан. Тўғон билан боғлиқ муаммо мавжуд эмас. Хавотирга ўрин йўқ!», — дейилади баёнотда.

Таъкидланишича, айни пайтда ушбу носозлик тўлиқ бартараф этилган, 40 метр куб сув тўлиқлигича каналга йўналтирилган.