Uzbekistan Airports акциядорлик жамияти бошқарув раиси Раъно Жўраева Alter Ego лойиҳасига берган интервюсида Бухоро халқаро аэропорти учун янги терминал ва Урганч шаҳрида янги аэропорт қуриш режалари ҳақида гапирди.
11 апрель куни давлат-хусусий шериклик асосида Бухоро аэропортининг янги халқаро терминалини қуриш лойиҳаси президентга тақдим этилган эди. Инвестициялар ҳажми 136 миллион долларни ташкил этиши кутилмоқда. Лойиҳа 2022−2024 йилларда амалга оширилиши режалаштирилган.
«Бухородаги аэродром реконструкция қилинади. У ерда бутун аэродром диққат билан кўздан кечирилди. Пойдевори яхши ҳолатда… Лекин у ерда гўзал, худди Самарқанддагидек янги халқаро йўловчи терминалини қуриш керак бўлади. Биз унинг локациясини ўзгартирмаяпмиз, ўша жойда бўлади — бу янги терминал учун жой топилди, — деди Раъно Жўраева.
Урганч аэропортига келсак, «у ерда ҳаммаси шўрланиш туфайли яроқсиз ҳолга келган ва реконструкцияга ярамайди», дея таъкидлади Uzbekistan Airports раҳбари.
«Бухорода ҳам шу муаммо бор, лекин турклар 2008 йилдан 2012 йилгача у ерда бетонли пойдевор ясашган ва жуда яхши қуришган. Яъни, унинг бетони ҳозирда ишлаб чиқарилаётган бетонга қараганда сифатлироқ. Шунинг учун у яхши ҳолатда. Биз [пойдеворни текшириш учун] 50 дан ортиқ тешик очдик ва бетоннинг ҳолатини кўриб чиқдик, уни ҳамма жойи яхши ҳолатда», деди у.
Раъно Жўраеванинг таъкидлашича, янги Урганч аэропорти учун жойни мавжуд ҳаво бандаргоҳи орқасида жойлаштириш таклиф қилинган.
«У ерда бўш ер участкаси бор, ҳеч ким йўқ. Биз ҳеч кимни сотиб олганимиз йўқ, ҳеч кимни ҳайдаганимиз ҳам йўқ. Қишлоқ хўжалиги ерларининг бир қисми унинг ҳудудига ўтади, аммо биз у ернинг бир қисмини шаҳарга берамиз», дея қўшимча қилди у.
Аввалроқ биз шу интервюда Uzbekistan Airports раҳбари Тошкентда янги аэропорт қуриш таклифини бергани, Фарғона водийси ҳамда ҳудудий Silk Avia авиакомпанияси учун ягона аэропорт лойиҳаси ҳақида гапирганини ёзган эдик.
