Telegram ўз мессенжерининг янги версиясида пуллик — Premium обуна пайдо бўлганини эълон қилди. Компания, шунингдек, илованинг ойлик фаол фойдаланувчилари сони 700 млн га етганини ва 2022 йилда «дунё бўйича энг кўп юклаб олинган топ-5 иловалар қаторига кирганини» маълум қилди. Компания хабарида «Telegram Premium обунаси орқали сиз Telegram нинг келгусидаги ривожини қўллаб-қувватлашингиз ҳамда қўшимча имкониятларга эга бўлишингиз мумкин», деб ёзилган.

Telegram Premium қанча туради ва унинг қандай қулайликлари бор?

Маълум бўлишича, Telegram мессенжерининг пуллик обунаси — ойига 449 рубль, яъни 65 минг сўм туради.

«Обуначиларнинг ҳиссаси бизга Telegram нинг бепул, мустақил ва фойдаланувчиларга йўналтирилган бўлиб қолиши учун янада ривожлантириш ва такомиллаштириш имконини беради», — дейилади Telegram жамоаси баёнотида.


Telegram Premium’га обуна бўлган фойдаланувчилар учун қуйидаги лимитлар кенгаяди:

  • папкага жойлаштириш мумкин бўлган чатлар сони оширилади (бепул версияда — 100; Premium’да — 200);
  • канал ва супергуруҳларга аъзо бўлиш лимит оширилади (500 дан 1000 гача);
  • папкалар сони 10 тадан 20 гача оширилади;
  • шахсий каналлар ва супергуруҳлар учун оммавий ҳаволалар (link) сони бўйича чекловлар сони 10 дан 20 га оширилади;
  • сақлаб қўйиш мумкин бўлган GIF-анимациялар сони 200 дан 400 га оширилади;
  • иловага киритиб қўйиш мумкин бўлган аккаунтлар (алоҳида телефон рақамлари орқали) сони 3 дан 4 га оширилади;

Иловага 4 ГБ гача ҳажмга эга файлларни юклаш мумкин бўлади

Telegram’нинг бепул версиясида фото, видео ёки бошқа турдаги файлларнинг ҳажми 2 ГБ дан (битта файлнинг) ошмаслиги керак эди. Пуллик обунада эса 4 ГБ гача бўлган ҳажмдаги файлларни юклаш имконияти мавжуд. Аммо шуни таъкидлаш керакки, мессенжернинг иккала версиясида ҳам файлларни чегаралагмаган миқдорда юклаш мумкин. Фақат Premium обуна орқали катта файлни, айтайлик 4 соатлик 1080p форматдаги видеони (ўртача 4 ГБ жой олади) иккига ажратиб ўтириш шарт эмас.

Юклаш тезлиги

Шунингдек, Telegram Premium обунаси турли хил файлларни максимал тезликда юклаб олиш ва юклаш имкониятини беради. Файл кўчириш тезлиги фойдаланилаётган интернетнинг тезлигига боғлиқ бўлиб қолади.

Овозли хабарларни матн шаклига ўтказиш функцияси

Premium обуначилар қабул қилинган овозли хабарларни битта клик орқали матн кўринишига келтиришлари мумкин.

Рекламаларсиз Telegram

Каналларнинг қўйи қисмига жойлаштириладиган реклама текстларини сиз Telegram Premium’да учратмайсиз. Яъни премиум-фойдаланувчилар мессенжердан рекламаларсиз фойдаланишади. Аммо каналлар администраторлари учун рекламаларни ўчириш учун пуллик функция ҳозирча мавжуд эмас.

Профиллар учун имкониятлар

Мессенжер пуллик обуначиларининг исмлари ёнида юлдуз кўринишида алоҳида белги пайдо бўлади. Ушбу белги профилда, чатлар рўйхатида ва хабарларда кўринади. Шунингдек, обуначилар ўз профилларига анимация кўринишидаги аватарларни ўрнатишлари мумкин.

Ҳозирча янги функциялар фақат iOS фойдаланувчилари учун очиқ, чунки ушбу мессенжернинг янги — 8.8 версияси биринчи бўлиб айнан шу операцион тизим учун чиқарилди. Таъкидланишича, бугунгача мавжуд бўлган барча функциялар бепул бўлиб қолади. Android ва Telegram Desktop учун пуллик версиялар ҳали тақдим этилмади, аммо тез орада чиқиши кутилмоқда.

Маълумот учун, Telegram асосчиси Павел Дуров пуллик обунанинг тақдим этилиши ҳақида 10 июнь куни ўз блогида эълон қилган эди. Бунгача эса 2021 йилнинг ноябрида Telegram’да илк монетизация кўриниши — реклама платформаси йўлга қўйилган эди.