Фуқаролар қонунчиликка оид таклифларини Қонунчилик палатасига киритиши Конституция билан мустаҳкамлаб қўйилиши мумкин. Бу таклиф президент Шавкат Мирзиёев томонидан билдирилди, деб хабар берди унинг матбуот котиби Шерзод Асадов.
«Фуқароларнинг давлат ишларини бошқаришдаги иштирокини кенгайтириш мақсадида қонунчилик ташаббуси ҳуқуқи институтини ислоҳ қилишни мақсадга мувофиқ, деб ҳисоблайман», — деди у.
Давлат раҳбари Конституцияга қонунчилик таклифларини киритиш институтини жорий этишни таклиф қилди.
«Мазкур институт доирасида 100 минг кишидан кам бўлмаган миқдордаги фуқаролар ўз қонунчилик таклифларини Олий Мажлис Қонунчилик палатасига киритиш имкониятига эга бўладилар. Шу асосда [таклиф маъқулланса] энди халқ бевосита қонун ижодкори сифатида ташаббус кўрсатиш ҳуқуқини қўлга киритади», — деди Шавкат Мирзиёев.
Президент мазкур янги қонунчилик таклифларини киритиш институтини Сенат, Омбудсман ва Марказий сайлов комиссиясига ҳам бериш вақти келди, деб ҳисоблашини қўшимча қилди.
Унинг сўзларига кўра, ижро ҳокимияти органларининг конституциявий жавобгарлик соҳаларини, ваколатларини кенгайтириш билан бирга уларнинг амалга оширилиши устидан жамоатчилик ва парламент назоратини кучайтириш ҳам талаб этилади. «Шу маънода, Ҳукумат ваколатларини кенгайтиришни таклиф этаман», — деди Шавкат Мирзиёев.
Душанба куни шунингдек, Ўзбекистон президенти ҳокимлар бир вақтнинг ўзида халқ депутатлари Кенгашларига ҳам бошчилик қилиши ҳақидаги қоидани Конституциядан чиқариб ташлаш вақти келганини маълум қилди.
