Ўзбекистонда 2023 йилдан бошлаб қўл жанги бўйича иккита халқаро турнир ташкил этилади. Бу Шавкат Мирзиёев 20 июнь куни имзолаган «Қўл жанги спорт турини янада ривожлантириш чора-тадбирлари тўғрисида»ги қарорда акс этган. Ҳужжат матни ЎзАда эълон қилинди.
Қайд этилишича, Ўзбекистонда 10 минг нафардан ортиқ ёшлар ва ҳарбий хизматчилар (ходимлар) қўл жанги бўйича спорт машғулотларида мунтазам шуғулланиб келмоқда. Мамлакатда ушбу спорт тури бўйича 230 нафар Ўзбекистон ва 60 нафар Халқаро тоифадаги спорт усталари етишиб чиқди. Қолаверса, қўл жанги МДҲ мамлакатлари орасида ҳар йили ўтказиладиган «Армия ўйинлари» дастурига киритилган.
Шу муносабат билан, президент қарорида қўл жанги спорт турини ривожлантиришнинг асосий йўналишлари белгилаб берилди.
Унга кўра, ушбу спорт турининг асосий йўналишлари этиб:
- қўл жанги бўйича тизимли равишда мусобақалар ўтказиш ҳамда иқтидорли спортчиларни аниқлаш, танлаш ва саралаш (селекция);
- қўл жангини янада оммалаштириш, бу борада ёшларни спорт клублари, секциялари ва тўгаракларига кенг жалб этиш ҳамда шу орқали спортчиларнинг жиноятларни содир этиш ва жиноий гуруҳларга қўшилиб кетишининг олдини олиш;
- қўл жанги бўйича профессионал тренерлар, малакали ҳакамлар ва мутахассисларни тайёрлаш тизимини ривожлантириш, ўқув-услубий қўлланмалар ишлаб чиқиш;
- қўл жанги билан шуғулланиш учун зарур моддий-техник база ва инфратузилмани шакллантириш;
- қўл жангини ҳам устувор спорт тури сифатида Қуролли Кучлар ва ҳуқуқни муҳофаза қилиш органларининг жисмоний тайёргарлик машғулотларига босқичма-босқич киритиш;
- қўл жангини Қуролли Кучлар хизматчилари ва ҳуқуқни муҳофаза қилиш органлари ходимлари ҳамда аҳоли ўртасида, шу жумладан, оммавий ахборот воситалари орқали кенг тарғиб қилиш кўрсатиб ўтилди.
Қарорга кўра, Ўзбекистон ҳуқуқни муҳофаза қилиш органларининг Қўл жанги федерацияси, Миллий гвардия, ДХХ, Мудофаа, Ички ишлар, Фавқулодда вазиятлар вазирликлари, Давлат божхона қўмитаси ҳамда Спортни ривожлантириш вазирлиги 2023 йилдан бошлаб анъанавий тарзда қўл жанги спорт тури бўйича тўртта мусобақа ташкил этади:
- Тошкентда 14 январь — Ватан ҳимоячилари кунига бағишланган Қуролли Кучлар чемпионатини ҳамда ўз хизмат вазифасини бажариш чоғида қаҳрамонлик ва жасорат кўрсатиб, ҳалок бўлган ҳарбий хизматчилар ва ходимлар хотирасига бағишланган Хотира турнири;
- ҳар йили Наманганда профессионал спортчилар ўртасида «Президент кубоги» халқаро турнири;
- ҳар икки йилда бир маротаба Қарши, Самарқанд ва Бухоро шаҳарларида ёшлар ўртасида «Амир Темур кубоги» халқаро турнири.
Қайд этилишича, халқаро турнирларда маҳаллий спортчилар билан биргаликда юқори рейтингга эга бўлган кучли халқаро спортчилар, тренерлар ва ҳакамлар ҳам иштирок этишади.
Бундан ташқари, ҳужжатда Спортни ривожлантириш вазирлиги ҳамда Ўзбекистон ҳуқуқни муҳофаза қилиш органларининг Қўл жанги федерациясига уч ой муддатда қўл жанги бўйича тренерлар, ҳакамлар ва мутахассисларни қайта тайёрлаш ҳамда уларнинг малакасини ошириш режасини ишлаб чиқиш юклатилди.
Қарорда белгиланишича, 2022/2023 ўқув йилидан бошлаб умумий ўрта таълим мактабларида қўл жанги бўйича таниқли ва фахрий спортчилар ҳамда тренерлар иштирокида семинар, тренинг, маҳорат сабоқларини ташкил этилади.
Шунингдек, республикадаги ҳар бир ҳудуднинг битта туман (шаҳар)ида қўл жангини устувор спорт тури сифатида белгилаш ҳамда уни ривожлантириш ва оммалаштириш бўйича «йўл хариталари»ни ишлаб чиқиш белгиланди.
