Ҳукуматнинг 10 июндаги [327-сонли] қарори билан узум кўчатларини шпалерга (ёғоч ва бошқа синувчан устунлардан ташқари) кўтариш харажатларининг бир қисмини қоплаш тартиби тўғрисидаги низом тасдиқланди. Бу хаsда Адлия вазирлиги хабар берди.

Низомга асосан, хўраки ва кишмишбоп токзорларни барпо этган талабгорга Боғдорчиликни ривожлантириш жамғармаси ҳисобидан субсидия берилади. Саноатбоп токзорларни барпо этган талабгорга эса субсидия Виночиликни ривожлантириш жамғармаси ҳисобидан ажратилади.

Субсидия токзорларда узум кўчатларини кўтариш мақсадида шпалерни ўрнатиш (қуриш) ишлари якунлангандан сўнг фақат бир маротаба, бир дона шпалер учун 15 минг сўмдан ортиқ бўлмаган миқдорини қоплаш учун ажратилади.

Талабгор субсидия олиш учун шпалерни ўрнатиш (қуриш) ишлари якунлангандан сўнг хулоса олиш учун туман ишчи гуруҳига аризани ёзма ёки электрон шаклда юбориши керак. Ўрганиш натижаси юзасидан 1 кунда ижобий ёки салбий хулоса берилади.

Тегишли агентликлар туманлар қишлоқ хўжалиги бўлимлари билан биргаликда 5 йил мобайнида шартномада кўрсатилган параметрларнинг бажарилиши юзасидан мониторинг олиб боради. Назоратчилар берилган субсидиядан мақсадли фойдаланилмаётгани ёки яроқсиз ҳолдалигини аниқласа, уларни видеокамерага орқали ёзиб олиб, 2 кун муддатда туман ишчи гуруҳига тақдим қилиши мумкин.

Хабар ўз тасдиғини топса, бу ҳақда хабар қилган назоратчи тегишли агентлик томонидан рағбатлантирилади. Рағбатлантириш талабгордан ундирилган субсидиянинг 5 фоизи миқдорида амалга оширилади.

Шунингдек, мазкур қарор билан тасдиқланган Виночилик асбоб-ускуналарини харид қилиш харажатларининг бир қисмини қоплаш тартиби тўғрисидаги низомга кўра, виночилик асбоб-ускуналарини харид қилиш харажатларининг бир қисми қоплаб берилади. Бунда ҳар бир виночилик асбоб-ускуналарини харид қилиш харажатларининг 20 фоизи, бироқ 300 миллион сўмдан ортиқ бўлмаган миқдорда пул тўланади.