Президент Администрацияси ҳузуридаги Ахборот ва оммавий коммуникациялар агентлиги 11 июнь куни «Пахтакор» стадионида футбол бўйича U-23 Осиё кубоги чорак финали доирасида Ўзбекистон — Ироқ ўйинини ёритишга борган «Sevimli» телеканали мухбири ва тасвирчиси калтаклангани юзасидан баёнот билан чиқди.
Телеканал ўз ходимларига таяниб, ИИО ва Миллий гвардия ходимлари журналист ва тасвирчига куч ишлатгани, жумладан электрошокер қўллаб, тасвирчининг камераси ва микрофонини олиб қўйганини маълум қилганди. ИИВ матбуот котиби телеканал тасвирчиси жанжал вақтида жароҳат олганига ишонтиришга уринди.
АОКА ички ишлар вазирлиги, Бош прокуратура ва Миллий гвардияга сўровлар юборганини ва ҳуқуқни муҳофаза қилиш органлари ходимларининг ҳаракатлари устидан ички текширув ўтказилишини кузатиб боришини қайд этди.
«Ишонамизки, Ички ишлар вазирлиги ва Миллий гвардия амалдаги қонунчилик нормаларини четлаб ўтган ходимларининг хатти-ҳаракатларига муносиб баҳо беради ҳамда тегишли чора кўради. Ўзбекистон Республикаси Бош прокуратураси эса ушбу масалани ўз назоратига олишини сўраб қоламиз», — дейилади баёнотда.
«Агентлик ОАВ вакиллари фаолиятига тўсқинлик қилиш, ноқонуний йўллар билан дахл қилиш, шахсини обрўсизлантиришга бўлган ҳар қандай уринишларни кескин қоралайди», — дейилади хабарда.
АОКА қонунчилик ҳужжатларига ҳавола келтирган ҳолда «ОАВ вакилларининг касбий фаолияти давомида тазйиқ кўрсатиш, тўсқинлик қилиш каби ҳолатлар сўз ва матбуот эркинлигини таъминлаш борасидаги давлат сиёсатига зид» эканлигини таъкидлади.
Агентлик, ўз навбатида, барча даражадаги давлат идоралари ходимларини ахборот қонунчилиги ҳамда журналистлар ваколатларига ҳурмат билан муносабатда бўлишга чақирди.
