Австриянинг энг йирик банки «UniCredit Bank Austria AG» компанияси Ўзбекистон қишлоқ хўжалиги соҳасига инновацион технологиялар трансферини молиялаштириш учун 7,9 миллион евро миқдорида «софт-лоун» (имтиёзли молиялаштириш) маблағини ажратди, деб хабар берди «Дунё» АА.
Лойиҳа Ўзбекистон қишлоқ хўжалигини Австриянинг «Bauer GmbH» компаниясининг ёмғирли суғориш учун инновацион технологиялари билан жиҳозлашни назарда тутади.
Ўзбекистон элчиси Абат Файзуллаев Венада Австриянинг «UniCredit Bank Austria AG» компаниясинингн таркибий савдо ва экспортни молиялаштириш департаменти директори Марион Кристен ҳамда таҳлил ва халқаро ҳамкорлик департаменти директори Райнхард Пош билан музокаралар ўтказди. Унда илгари Қишлоқ хўжалиги вазирлиги ва Австрия томони ўртасида имзоланган лойиҳа шартлари ҳақида фикр алмашилди.
Музокаралар чоғида томонлар мамлакат қишлоқ хўжалиги соҳасини инновацион Австрия технологиялари билан модернизациялашни молиялаштириш учун имтиёзли кредит линиясини очиш бўйича келишувга эришди.
Қолаверса, банк-молия соҳасидаги ҳамкорликни кенгайтириш, Австрия ҳукуматининг экспорт ва инвестицияларни молиялаштириш ҳамда «софт-лоун» маблағини Ўзбекистон иқтисодиётига жалб этиш масалалари ҳам муҳокама қилинди.
Учрашув аввалида Австриянинг энг йирик молия институти вакилларига Ўзбекистонда банк соҳасида амалга оширилаётган кенг кўламли ислоҳотлар, шунингдек, халқаро стандартларга жавоб берадиган ва хорижий инвестициялар учун жозибадор шарт-шароитлар яратадиган ҳуқуқий муҳит ҳақида маълумот берилди. Йиғилиш иштирокчилари Шавкат Мирзиёевнинг 2020 йил 12 майдаги «2020−2025 йилларга мўлжалланган Ўзбекистон Республикасининг банк тизимини ислоҳ қилиш стратегияси тўғрисида»ги фармонининг асосий қоидалари билан ҳам таништирилди.
Австрия назорат банки (OeKB) билан ҳамкорликда Ўзбекистонда амалга оширилаётган ижтимоий лойиҳалар учун «софт-лоун»нинг минимал ва ҳатто ноль фоиз ставкаси билан тақдим этилгани алоҳида қайд этилди.
«UniCredit» бошқарма бошлиғи банк Австрия компаниялари иштирокида тижорат экспорт кредитларини кўриб чиқишга тайёрлигини билдирди. Унда Австрия товарлар ва хизматларининг улуши 50 фоиздан ошади. Таъкидланишича, халқаро стандартларга мувофиқ, «UniCredit» лойиҳа қийматининг 85 фоизини молиялаштиради ва қолган 15 фоизи импорт қилувчининг ўз маблағлари ҳисобидан амалга оширилади.
Шуни таъкидлаш керакки, ушбу молиявий восита хорижий импортчиларга мавжуд узоқ муддатли ва имтиёзли молиялаштириш билан замонавий Австрия инновацион технологиялари ва «ноу-хау"ларини сотиб олишга имкон беради.
Маълумот ўрнида, «UniCredit Bank Austria AG» Австриянинг энг йирик банки ҳисобланади. Банкнинг асосий фаолияти инвестициялар, активларни бошқариш, экспорт операцияларини молиялаштириш ва капитал бозорига қаратилган. Ушбу молия муассасаси мамлакат бўйлаб 300 дан ортиқ филиалларига эга. Уларда 7700 дан ортиқ ходимнинг бандлиги таъминланган.
1946 йилда Вена шаҳрида ташкил этилган Австрия назорат банки экспортни молиялаштириш ва имтиёзли кредит линияларини таъминлаш бўйича давлат тузилмаси ҳисобланади. OeKB акциядорлари Австрияда рўйхатдан ўтган тижорат банкларидир. Австрия Молия вазирлиги билан биргаликда OeKB ижтимоий лойиҳалар учун «софт-лоун»ни тақдим этади. Ҳозирги вақтда банкнинг умумий активлари 33,4 миллиард евродан зиёдни ташкил этмоқда.
