Пахта ва дон экин майдонларида сувни тежайдиган технологияларни қўллаш учун субсидиялар ажратиш тартиби тасдиқланди. Бу ҳукуматнинг 7 июндаги [315-сонли] қарорида қайд этилган, деб хабар берди Адлия вазирлиги.
Ҳужжат билан пахта ва бошоқли дон экин майдонларини суғориш учун қайта тикланувчи энергия манбалари ҳамда кўчма генераторлар каби ускуналарни сотиб олиш харажатларининг бир қисмини қоплаш тартиби тўғрисидаги низом тасдиқланди.
Низомга кўра, талабгорларга 10 гектардан кам бўлмаган, сувни тежайдиган суғориш технологиялари жорий этилган пахта ва бошоқли дон экин майдонларини суғориш учун:
- қайта тикланувчи энергия манбалари ускуналарини сотиб олиш харажатларининг 50 фоизигача, бироқ 100 млн сўмдан ортиқ бўлмаган миқдорда;
- кўчма генераторлар ускуналарини сотиб олиш харажатларининг 30 фоизигача, бироқ 30 млн сўмдан ортиқ бўлмаган миқдорда субсидия берилади.
Талабгорлар субсидия ажратиш юзасидан ариза билан туман ҳокимлигига мурожаат қилиши керак. Ҳужжатлар мурожаат келиб тушган кундан бошлаб 10 иш кунида ўрганиб чиқилади.
Ҳудудий ишчи гуруҳ️ ҳар 10 кунда талабгорга субсидия ажратиш тўғрисидаги хулосаларни тушган кундан эътиборан умумлаштириб, таҳлил қилади. Субсидия оладиган талабгорларнинг рўйхати 1 августгача Сув хўжалиги вазирлигига, 20 ноябргача Қишлоқ хўжалиги вазирлигига тақдим этилади.
Шунга асосан, вазирликлар томонидан субсидиялар тегишлича 10 августгача ҳамда 1 декабргача ажратилади.
Жорий йилнинг март ойида президент қарори билан қишлоқ хўжалигида томчилатиб суғориладиган экин майдонининг ҳар бир гектарига субсидия берилиши ҳақида ёзгандик. Бунда пахта майдонлари учун 8 млн сўм — Қорақалпоғистон ва Хоразмда 12 млн сўм, сабзавот ва полиз экинлари учун 1,5 млн сўмдан 2,5 млн сўмгача, мевали экинлар учун 6 млн сўм, узум майдонлари учун эса 8 млн сўмдан ажратилади. Бунинг учун республика бюджетидан жорий йилда 1 трлн 182,4 млрд сўм маблағ йўналтирилади.
