2 июнь куни тушдан кейин Хоразм вилоятининг Урганч шаҳридаги гавжум кўча четида турган Cobalt русумли автомобиль ҳайдовчиси ваҳшийларча ўлдириб кетилди. Ижтимоий тармоқларда ҳодиса акс этган видеоёзув пайдо бўлди.

Видеода бир неча киши, жумладан камида битта бошланғич синф ўқувчиси машина томон югураётганини кўриш мумкин. Шундан кейин бир киши ҳайдовчи ўтирган автомобиль салонига эгилиб, унга пичоқ билан бир неча марта зарба бергани акс этган. Яна бир йигит югуриб келиб, машинанинг очиқ ойнасидан айрим ҳаракатларни амалга оширган (видеодан у нима қилганини аниқлаш қийин). Кейин йигитлар қочиб кетишди.

Шунингдек, кадрлардан одамлар саросимага тушгани ва бир аёл ҳушидан кетиб, кишилар ёрдами билан ўзига келтирилганини кўриш мумкин. Кейин эса тўпланганлар автомобиль томон югуришади.

Видео остида қолдирилган изоҳда қотиллик саккиз киши томонидан содир этилгани айтилган.

Бош прокуратура матбуот котиби Ҳаёт Шамсутдинов чоршанба куни қўзғатилган жиноят иши доирасида 1 нафар шахсга Жиноят кодексининг 97-моддаси (Қасддан одам ўлдириш) билан айб эълон қилиниб, қамоққа олинганини маълум қилди. Қолган 7 нафар шахсга Жиноят кодексининг 277-моддаси (Безорилик) билан айб эълон қилиниб, 1 нафари қамоққа олингани ва 6 нафари тилхат асосида қўйиб юборилган.