ФИФА ҳамда УЕФА билан ҳамкорликда футбол билан боғлиқ илмий рақамларни ўрганувчи Швейцариянинг Халқаро спорт тадқиқотлари маркази (CIES Football Observatory) ёзги трансфер бозори арафасида дунёнинг 100 нафар энг қиммат футболчилари нархи ва рейтингини эълон қилди.
CIES маълумотларига кўра, рўйхатда энг қиммат футболчи сифатида май ойида ПСЖ билан ўз шартномасини янгилаган Килиан Мбаппе қайд этилди. Унинг трансфер бозоридаги нархи €205,6 млн этиб белгиланган.
Топ-10 таликдан, шунингдек, «Манчестер Сити» ва «Барселона»нинг учтадан, «Реал Мадрид», «Боруссия Дортмунд» ва «Ливерпуль»дан 1 нафардан футболчи жой олган.
- Килиан Мбаппе — ПСЖ, трансфер баҳоси €205,6 млн;
- Винисиус Жуниор — «Реал Мадрид», трансфер баҳоси €185,3 млн;
- Эрлинг Хааланд — «Манчестер Сити», трансфер баҳоси €152,6 млн;
- Педри Гонсалес — «Барселона», трансфер баҳоси €135,1 млн;
- Жуд Беллингем — «Боруссия Дортмунд», трансфер баҳоси €133,7 млн;
- Фил Фоден — «Манчестер Сити», трансфер баҳоси €124 млн;
- Фрэнки де Йонг — «Барселона», трансфер баҳоси €112,5 млн;
- Луис Диас — «Ливерпуль», трансфер баҳоси €110 млн;
- Рубен Диас — «Манчестер Сити», трансфер баҳоси €109,6 млн
- Ферран Торрес — «Барселона», трансфер баҳоси €109,5 млн.
Халқаро спорт тадқиқотлари маркази португалиялик Рубен Диасни марказий ҳимоячилар ичида, Трент Александер-Арнольдни эса (€87 млн) қанот ҳимоячилари орасида энг қиммати деб топган.
Дарвозабонлар рейтингида Жанлуижи Доннарумма (€74 млн), ярим ҳимоячилар бўйича Педри Гонсалес (€135 млн) энг юқори нархлангани бўлди.
«Кучли бешлик» чемпионатларида ўйнамайдиган футболчилар орасида энг қиммати 47-ўрин билан «Бенфика» ҳужумчиси Дарвин Нунес (€70 млн) бўлди. Топ-100ликдаги энг кекса футболчи 30 ёшли Кевин де Брюйне (76-ўрин, €57 млн евро), 17 ёшли Пабло Гави (73-ўрин, €58 млн) энг ёш қиммат ўйинчи деб топилди.
«Кучли бешлик» чемпионатлари ичида Англия Премьер-лигаси клублари қиммат футболчилар кўплиги билан рейтингда етакчилик қилмоқда — топ-100 таликдаги 41 футболчи АПЛдан.
Қайд этилишича, CIES Football Observatory футболчиларнинг нархини белгилашда энг аввало унинг ёши, кейин клуб ва терма жамоасидаги мавқеи, жамоаларининг кўрсатаётган натижалари ҳамда ўйнайдиган лигасининг мавқеи ва у ҳаракат қиладиган лига вакилларининг халқаро мусобақалардаги иштироки; ўйинчининг клуб билан имзолаган шартномаси, товон пули ҳамда клуб ва терма жамоадаги фойдали ҳаракатлари (дақиқа, гол, ассист, дриблинг ва узатма) эътиборга олади. Ташкилотнинг қайд этишича, белгиланган нархлар инфляция ҳисобига 5%гача бозор қийматидан фарқланиши ёки трансферни амалга ошириш жараёнида клублар ўртасидаги келишув бўйича ўзгариши мумкин.
Аввалроқ, Форбс нашри энг қиммат клублар рейтингини эълон қилган эди. Унга кўра, «Реал Мадрид» дунёдаги энг қиммат футбол клуби деб топилган. Жамоанинг қиймати $5,1 млрдга баҳоланган. Шунингдек, учликдан — «Барселона» ($5 млрд) ва «Манчестер Юнайтед» ($4,6 млрд) жой олган эди.