Қозоғистон ҳудудида коронавирус тарқалишига қарши кураш бўйича Идоралараро комиссия қарори билан 8 июндан бошлаб мамлакат чегарасини кесиб ўтишда ПЗР тест ёки COVID-19`га қарши эмланганлик ҳужжатига эга бўлиш бўйича талаби бекор қилинмоқда. Қарор Қозоғистон фуқаролари ва ҳорижий фуқароларга ҳам бирдек тааллуқли.
Бундан ташқари, комиссия қарори билан Қозоғистон чегарасининг айрим участкаларида мамлакатнинг 7 та вилоятидаги 12 та вақтинчалик ёпилган автомобил ўтказиш пунктларининг иши тикланади.
Аввалроқ худди шундай қарор Туркия томонидан ҳам қабул қилинган эди. 1 июндан бошлаб мамлакатга киришда манфий ПЗР тест ёки эмланганлик ҳақидаги ҳужжатни кўрсатиш бекор қилинди.
Австрия ҳам 16 майдан бошлаб хорижлик сайёҳлар учун коронавирус билан боғлиқ барча чекловларни бекор қилди. Чегарадан ўтишда энди эмланганлик сертификати, касаллик гувоҳномаси ёки ПЗР тестини тақдим этиш шарт эмас.
Маълумот ўрнида бугунги кунда Қозоғистонда 1 305 798 та коронавирус юқиши ҳолатлари аниқланган ва 13662 нафар инсон касаллик асоратларидан вафот этган.
