Жорий йилнинг тўрт ойида Россиядан Ўзбекистонга 133 минг нафар меҳнат муҳожири қайтди, шундан 50 минг нафари — март ойида, 54 минг нафари — апрель ойида келди. Бу ҳақда «Газета.uz»га Бандлик ва меҳнат муносабатлари вазирлиги матбуот хизмати хабар берди.
Январь-апрель ойларида жами 282,3 минг нафар меҳнат муҳожири, жумладан, Қозоғистондан 41,3 минг нафар, Туркиядан 15,8 минг нафар, Украинадан 5204 нафар ва Корея Республикасидан 2704 нафар меҳнат муҳожири қайтган.
Бандлик ва меҳнат муносабатлари вазирининг биринчи ўринбосари Эркин Мухитдинов 26 май куни Бухорода ўтган камбағалликни қисқартириш бўйича халқаро форум доирасида Ўзбекистон Россиядан меҳнат муҳожирларининг чиқиб кетишидан қўрқишини, чунки энг кўп ўзбек диаспораси айнан шу мамлакатда жойлашганини айтди. Шунингдек, у энг катта ташқи сиёсат ва геосиёсий рисклар Россияда эканлигини таъкидлади.
«Аммо пандемия даврида Россия ва бошқа мамлакатларнинг иш берувчилари бизнинг ишчи кучимизнинг қадрига етишди. Улар [ишчиларни] йўқотишди, қийинчилик билан тиклашди ва ҳозир уларни ушлаб туришмоқда. Улар энди муҳожирларнинг ишчи кучини тежашга ҳаракат ҳам қилмаяпти. Яъни, ташқи сиёсий хавфлар туфайли уларнинг фаолияти ёки рентабеллиги учун таҳдид бор ва улар мигрантлар меҳнатидан эмас, балки бошқа харажатларни тежашга ҳаракат қилмоқда», — деди вазирнинг биринчи ўринбосари.
Эркин Мухитдинов сўнгги йилларда Ўзбекистонда меҳнат муҳожирларини хорижий давлатларга жўнатиш ишлари уюшқоқлик билан йўлга қўйилганини таъкидлади.
«Кадрлар ташкилий равишда қабул қилинганда, меҳнатга ҳақ тўлаш, меҳнат ҳуқуқларини ҳимоя қилиш, ижтимоий ҳимоя қилишнинг озми-кўпми тушунарли схемаси мавжуд. Муаммолар бўлса, уларни ҳал қиладиган канал бор», — деди у.
Ўзбекистон фуқароларининг оммавий равишда ўз ватанига қайтмаслигининг учинчи сабаби — рубль курси.
«Рублнинг долларга ва шунга мос равишда сўмга нисбатан курси. Биринчи хавф рубль курси туфайли эди. Агар у кескин пасайганда, қайтиш хавфи мавжуд эди. Курс ўз жойига қайтди, шунинг учун асосий омил ҳозирча кун тартибидан олиб ташланди «, — деди у.
3 июнь ҳолатига кўра, доллар курси 61 рубль атрофида, бироқ бу кўрсаткич 9 март куни бир доллар учун тарихий максимал 120 рублга етганди. Россия ҳукумати томонидан кўрилган чоралар ҳисобга олинмаганда, АҚШ валютаси 180 рубль даражасида бўлар эди, деди Wells Fargo Securities валюта стратеги Брендан МакКенна Bloomberg`га. Рублнинг ҳозирги мустаҳкамланиши сунъий, дея қўшимча қилди у.
Расмий маълумотларга кўра, 2021 йил июль ҳолатига кўра, вақтинча хорижда меҳнат қилаётган меҳнат муҳожирлари сони ўртача 1,5 млн кишини ташкил этган бўлса, уларнинг 1 миллиондан сал ортиғи Россияда. Россия Федерацияси Ички ишлар вазирлиги маълумотларига кўра, ўтган йилнинг январь-сентябрь ойларида энг кўп чет эл фуқаролари Ўзбекистондан — 3,05 млн киши ишга жойлашиш мақсадида келган.
