Пойтахтдаги «А.А.» компаниясининг кассири Б. Р. апрель ойида харидорларнинг 1,6 млрд сўмлик 152 та чекларини рўйхатдан ўтказиб, 16,48 млн сўмдан ортиқ кешбэк ишлаб олгани маълум бўлди.

Давлат солиқ қўмитаси матбуот хизмати «шубҳали» чеклар учун тўлаб берилган сумма тўлиқ бекор қилинганини маълум қилди.

Ўз навбатида, кассир томонидан бир ой ичида 1,8 млрд сўмлик 443 та чек расмийлаштирилиб, 18 млн сўмдан ортиқ кешбэк жамғарилгани аниқланган.

Ҳукуматнинг 12 майдаги [255-сон] қарорига мувофиқ, ДСҚ онлайн назорат касса техникаси чекини солиқ органларининг мобил иловасида рўйхатдан ўтказган жисмоний шахсдан унинг ҳақиқий харидлари тўғрисидаги тасдиғини сўраб олишга, харид ҳақиқатда ушбу жисмоний шахс томонидан амалга оширганлиги шубҳали бўлган тақдирда товарлар (хизматлар) қийматининг бир қисмини қайтаришни рад этиш тўғрисида қарор қабул қилишга ҳақли.