1 июнь куни Ҳукуматнинг «Тошкент шаҳрида барпо этилаётган ер усти метро линиялари остида жойлашган ер участкаларидан самарали фойдаланиш чора-тадбирлари тўғрисида»ги қарори қабул қилинди, деб хабар берди Адлия вазирлиги.
Ҳужжатга кўра, ер усти метро йўналишлари остида жойлашган тегишли ер майдонлари хатловдан ўтказилади ва уларнинг метро фаолиятига таъсир қилмайдиган қисми Тошкент шаҳар ҳокимлиги захирасига киритилади.
Ушбу ер майдонлари фудтрак ҳамда енгил турдаги қурилмаларни қуриш ва жойлаштириш учун «E-Auksion» электрон савдо платформаси орқали 5 йил муддатга ижара ҳуқуқи билан, истисно тариқасида, 12 ойга тенг улушларда бўлиб тўлаш шарти билан савдога чиқарилади.
Аукцион савдолари орқали олинган ер участкаларида савдо ва хизмат кўрсатиш, тайёр ҳолдаги овқатланиш маҳсулотлари билан савдо қилиш шохобчалари, китоб дўконлари, автотураргоҳлар ҳамда маданий ҳордиқ чиқариш ва спорт масканлари барпо этилади.
Шунингдек, Тошкент метрополитенининг «Дўстлик-Қўйлиқ» ер усти метро йўналиши 1−5 бекатлари оралиғидаги ер майдонларидан самарали фойдаланиш мақсадида қуйидагилар ташкил этилади:
- пиёдалар ва велосипед йўлаклари;
- автотураргоҳлар;
- аҳоли сайр қилиши учун сайилгоҳлар;
- болалар ва спорт майдончалари.
Эслатиб ўтамиз, ўтган йилнинг октябрь ойида АОКАда ўтказилган брифингда «Тошкент метрополитени» ДУК мутасаддилари ер ости ва ер усти метро бекатларида савдо ва хизмат кўрсатиш майдончалари ташкил этилиши ҳақида маълум қилганди.
