Ўзбекистон Давлат активларини бошқариш агентлиги Тошкентнинг Мирзо-Улуғбек туманидаги номсиз меҳмонхона бино ва иншоотлар мажмуаси сотилганини маълум қилди.
Гап Шўртепа кўчаси 2-уйда жойлашган уч қаватли бино ҳақида кетмоқда. Мажмуанинг умумий майдони 2,99 гектар, бино ва иншоотларнинг майдони 12143 квадрат метрни ташкил этади.
Тендерда объект учун 78,75 млрд сўм таклиф қилган Torgoviy Dom Metalloinvest Vostok компанияси ғолиб бўлди. У мажмуа эгаси бўлиш учун қисқа муддат ичида тўловни амалга ошириши керак.
ДАБА маълумотларига кўра, ким ошди савдосида иштирок этиш учун беш нафар талабгордан аризалар келиб тушган.
Spot.uz`нинг ёзишича, меҳмонхона тижорат мақсадларида эмас, балки ҳукумат манфаатлари учун фойдаланилган (шунинг учун ҳам Booking.com каби хизматлар рўйхатида йўқ). ДАБА 2021 йилда мулкни сотишга ҳаракат қилган, аммо харидор топа олмаган эди.
КТЯДР маълумотларига кўра, Torgoviy Dom Metalloinvest Vostok 2021 йил 24 декабрда 10,8 млрд сўм устав капитали билан рўйхатга олинган. Асосий фаолият тури — металл ва металл рудаларининг улгуржи савдоси.
Компания таъсисчиларидан бири Лебединский тоғ-кон бойитиш комбинати (51%) — темир рудасини қазиб олиш ва бойитиш, темир рудаси хом ашёси ва металл ресурсларини ишлаб чиқариш бўйича Россия ва МДҲдаги энг йирик корхона. Корхона «Металлоинвест» таркибига, у эса, ўз навбатида, миллиардер Алишер Усмоновнинг USM холдинги таркибига киради.
«Торгови Дом» акциядорлик жамиятининг 49 фоизи темир, пўлат ва ферроқотишма ишлаб чиқарувчи Hamkor Temir Savdo компаниясига тегишли. Ушбу корхона Дилмурод Илясович Пўлатовга (3,7%) ва у ягона асосчиси бўлган Metall West компаниясига тегишли.
Тадбиркор, шунингдек, Premium Polygraph (51,7%) ва Orient Finans (15%) акцияларига ҳам эгалик қилади.
