Ижтимоий тармоқларда 1 июнга болалар куни муносабати билан 200 минг тарқатилиши ҳақидаги хабарлар ортидан Халқ банк ва унинг филиаллари олдида навбатлар юзага келмоқда.
Мазкур ҳолатга Бюджетдан ташқари пенсия жамғармаси директори Абдулазиз Ҳайдаров АОКАда ўтказилаётган матбуот анжуманида муносабат билдирди.
«Ижтимоий тармоқларда „Болалар куни муносабати билан пул тарқатиляпти“ деган гап-сўзлар тарқалмоқда. Ушбу хабарлар мутлақо ёлғон, пуллар Президент қарорида белгиланган фуқароларгагина тарқатилади», — деди у.
У шунингдек бугунги кунга келиб, кимларга ва қандай турдаги ёрдам пуллари расман тақдим этилаётганини эслатиб ўтди.
«Пенсия на нафақа олувчиларга вилоятларда 300, Тошкент шаҳрида 400 минг сўмдан бир марталик ёрдам пуллари тарқатиш бошланган. Бугунги кунга қадар республика бўйича пул олувчиларнинг 65 фоизига тарқатиб берилди. Икки ҳафталик муддат ичида барча маблағлар тўлиқ эгаларига етказилади», — деди жамғарма раҳбари.
Абдулазиз Ҳайдаровнинг қўшимча қилишича, бундан ташқари, кам таъминланган оилалар реестрига киритилган, 18 ёшга тўлмаган 4 милиондан ортиқ болаларга 200 минг сўмдан нафақа берилади.
