Андижон, Жиззах ва Тошкент вилоятларида ўқишга киритишга бўлган ноқонуний ҳаракатларнинг олди олинди, дея хабар берди Бош прокуратура ҳузуридаги департамент матбуот хизмати.
Маълум бўлишича, Андижон вилоятининг Улуғнор туманида фуқаро Ш. . фуқаро Ф.ни Қирғизистондаги Ўш давлат университетида ишловчи танишлари орқали ушбу университетнинг жисмоний тарбия факультетига ўқишга киритиб, 2-босқичга ўтганлиги тўғрисидаги ҳужжатларни тайёрлаб беришини ваъда қилган. У бунинг эвазига 2 000 АҚШ долларини олган вақтида ашёвий далиллар билан ушланган.
Шунингдек, Тошкент вилоятининг Ўртачирчиқ туманида фуқаро М.Ф. фуқаро Ч.нинг ишончига кириб, уни қўшни Қозоғистоннинг Чимкент шаҳридаги университетнинг «Ҳуқуқ» йўналишига ўқишга киритиб қўйишини айтган. Гумонланувчи бунинг эвазига 1 200 АҚШ долларини олган вақтида ашёвий далиллар билан ушланган.
Бундан ташқари, Жиззах вилояти Жиззах шаҳридаги Абу Али ибн Сино номидаги жамоат саломатлиги техникуми ўқитувчиси Ш. С. (муқаддам фирибгарлик жинояти учун судланган) фуқаро У.га техникумга кириш имтиҳонларида ёрдам беришини айтган. У ушбу техникумга ўқишга киритиб қўйиш эвазига 400 АҚШ долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ, Жиззах давлат педагогика институти бўлим бошлиғи фуқаронинг ўқишини кўчириб беришни ваъда қилиб, бунинг эвазига $2500 олган вақтида қўлга олингани тўғрисида ёзган эдик.
