Европада илк бор ташкил этилган Конференциялар Лигаси финалида Италиянинг «Рома» клуби ҳамда Нидерландиянинг «Фейеноорд» жамоаси тўқнаш келди.
Албания пойтахти Тирана шаҳридаги Комбетаре аренасида ўтган баҳсда Жозе Моуриньо шогирдлари ягона гол эвазига мусобақа чемпиони бўлди. 32-дақиқада Николо Дзаньоло узоқдан берилган Манчинининг зарбасини танаси билан тўхтатиб, уни дарвоза томон йўналтирди. Учрашувда бошқа голлар урилмади.
Рома сафида ўйнаётган ўзбекистонлик ҳужумчи Элдор Шомуродов эса ўйиннинг 89-дақиқасида Абраҳамнинг ўрнига майдонга тушди. Бу унинг каръерасида Европада қўлга киритилган илк чемпионлик соврини бўлди.
Фото: Getty images
Ғалабадан сўнг Рома клуби мураббийи Жозе Моуриньо интервью вақтида йиғлаб юборди ва ғалабаси ҳақида фикр билдирди.
«Торино клубини 3:0 ҳисобида мағлуб этгандан сўнг кийиниш хонасида мен болаларга биз қилишимиз керак бўлган ишни қилдик, Европа лигасига йўлланма олдик, дедим. Ва бугун биз ишлаш учун эмас, балки тарих ёзиш учун чиқдик — ва биз буни бажардик. Биз бошиданоқ Конференциялар лигасида ғалаба қозонишимизни сезгандик. Ўйинлар тобора қийинлашди, „Марсель“ ва „Фейеноорд“ каби кучли жамоалар ғалаба қозонишди. Лекин бор эътиборимизни кубокка қаратдик ва шу сабабли чемпионатда очко йўқотдик», — деди у Sky Sport нашрига.
Фото: Sports.ru
