«Коммерсантъ» нашрининг хабар беришича, Россия Меҳнат вазирлиги хорижликларни ишга жойлаштириш бўйича пилот лойиҳаси доирасида Ўзбекистондан Россияга келиши мумкин бўлган мигрантлар сонига чекловни олиб ташлашни таклиф қилмоқда.
Ўз навбатида, идора тармоқ тамойилини бекор қилиш тарафдори — ҳозирча мамлакатдан ишчи кучи импорти учун фақат қурилиш сектори ва агросаноат комплекси корхоналари ариза беришлари мумкин, эндиликда тажриба доирасида иқтисодиётнинг бошқа тармоқлари ташкилотларига ҳам рухсат бериш таклиф қилинмоқда. Шу билан бирга, пилот лойиҳанинг мақсадли иштироки сақланиб қолади: ишчилар аниқ иш берувчининг талабидан келиб чиқиб жалб этилади.
Россия Меҳнат вазирлиги потенциал иштирокчилар доирасини кенгайтириш мақсадида Ўзбекистондан мамлакатга меҳнат мигрантларини мақсадли олиб кириш бўйича пилот лойиҳанинг бир қатор параметрларини ўзгартиришни таклиф қилмоқда. Ўтган йил октябрида Россия ҳукумати қабул қилган қарорга ўзгартириш киритишни назарда тутувчи лойиҳа кеча жамоатчилик муҳокамаси учун эълон қилинди.
Маълумот ўрнида, 2021 йилнинг октябрида Россия Меҳнат, Қурилиш ва Ички ишлар вазирликлари мамлакатга хорижлик ишчиларни жалб этишнинг янги механизми устида иш бошлаган. Ўзбекистон ҳукумати билан тузилган махсус битимга кўра, Россияга қурилиш ва агросаноат комплекси корхоналарига 10 минг нафар ўзбекистонликни жалб этишни назарда тутувчи пилот лойиҳа ишга туширилган эди.
Қарорга киритиладиган ўзгартиришлар лойиҳасида келтирилишича, Меҳнат вазирлиги ушбу пилот лойиҳа доирасида Россияга кириши мумкин бўлган ишчилар сонининг амалдаги чегарасидан воз кечишни таклиф қилмоқда. Бироқ бу ўз навбатида хорижликларни Россия иқтисодиётининг турли тармоқлари учун квоталар шаклида жалб қилиш бўйича жорий чекловни бекор қилмайди. Шунингдек, ўзгартиришлар билан иш берувчининг лойиҳада иштирок этиши учун ариза бера оладиган соҳа турларига қўйилган чекловлар олиб ташланади.
«Инвестицион технологиялар» МЧЖ бош директори Дмитрий Котровскийнинг таъкидлашича, «мавжуд барча харажатларга қарамай, қурилиш секторига ишчи кучи етишмаслиги билан боғлиқ муаммолар ҳеч қаерга йўқолмаган — ҳозирда вазият анча ёмонлашган». Унинг сўзларига кўра, пилот лойиҳа доирасида мамлакатга киришига рухсат бериладиган мигрантлар сонига қўйилган чекловнинг олиб ташланиши — «бу бозорга анча арзон ишчи кучи келмаса, мавжуд ресурслар етмай қолишини тушунишдир».
Шунингдек, Россияда мигрантларни пилот лойиҳа доирасида агросаноат учун жалб қилиш шу йилнинг февраль ойида 1,1 минг кишилик чекланган сон билан тақдим этилган эди. Россия Қишлоқ хўжалиги вазирлиги бу соҳада Ўзбекистонлик меҳнат мигрантлари сонини ошириш имкониятларини ўрганиб чиққан. Қайд этилишича, хориждан ишчи кучи жалб қилишга энг кўп боғланган тармоқлар сабзавотчилик, боғдорчилик, паррандачилик, сут, шунингдек, озиқ-овқат ва қайта ишлаш саноатларидир. Ўз навбатида, 2021 йилда агросаноат мажмуасида мавсумий ишлар учун мигрантларга бўлган эҳтиёж 38,2 минг кишини ташкил этган.
