Ҳуқуқ-тартибот идоралари ходимлари 17 май куни Тошкент шаҳрининг Юнусобод туманидаги уйи олдида қизга ҳужум қилган эркакни қўлга олди. Бу ҳақда Тошкент шаҳар Ички ишлар бош бошқармаси матбуот хизмати хабар берди.
Маълумотда айтилишича, Юнусобод туманида вояга етмаган қизга нисбатан номуносиб хатти-ҳаракатлар содир этган шахс — 1974 йилда туғилган Ю.Б. экани маълум бўлган ва у ушланган.
Ю.Б.га Маъмурий жавобгарлик тўғрисидаги Кодекснинг 183-моддаси (майда безорилик) ва 194-моддаси 1-қисми (ички ишлар органлари ходимининг қонуний талабларини бажармаслик) билан айблов қўйилган.
Жиноят ишлари бўйича туман судининг қарорига асосан ушбу шахсга нисбатан 10 сутка маъмурий қамоқ ҳамда жарима жазоси тайинланган.
17 май куни Nemolchi.uz лойиҳаси жабрланган қизнинг ҳикоясини эълон қилди. У ҳужумнинг вақти, жойи, гумонланувчининг кийган кийимлари ва ҳатто унинг тахминан ёшини батафсил баён қилди.
Қиз дўкондан уйига қайтаётганида эркак унинг ортидан келаётганини пайқаган. Уй ҳовлисига кирганида, эркак унинг ортидан эргашган.
«Мен уни кўрганимни билдириш учун, орқага ўгирилдим. У қўшниларнинг танишлари бўлса керак деб ўйлаётгандим, лекин кейинги ҳаракатларидан бундай эмаслигини англадим. Мен тезда зинадан кўтарила бошладим, тўсатдан бу одам орқамдан менга ҳужум қилди ва менинг чаноғимга тегинишни бошлади», — дейди жабрланувчи.
Қиз бақириб, эркакни уришни бошлайди, шу билан уни қўрқитиб юборади. Эркак қочиб кетади, қўшнилар буни кўришади ва ҳолат камералар тасвирига тушади.
Ўша куни қиз профилактика инспектори олдига боради, у эса ўз жойида бўлмайди. «19-санада у пайдо бўлди. Мен унга нима бўлганини айтиб бердим, лекин у [инспектор] эркак қўлга тушгандан кейин ариза ёзишим кераклигини айтди, бу мени ҳайратга солди», — дейди қиз.
21 май куни қиз Юнусобод тумани ИИБга ариза ёзган, бироқ у ерда ҳам ариза қабул қилинмай, профилактика инспекторининг олдига қайтариб юборилган.
«Ойим билан унинг (профилактика инспектори — таҳр.) олдига борганимизда, ниҳоят, беш кундан кейин ариза ёздик. Биз камерани текшириб кўрдингизми деб сўраганимизда, у „йўқ“ деб жавоб берди, мен органларимиз қанчалик „ғайрат билан“ ишлашидан ҳайратга тушдим», — дея қўшимча қилди у.
