Андижон вилоятининг Асака туманида 26 ёшли аёлнинг қорнида жарроҳлик амалиётидан кейин салфетка қолиб кетгани (видео) аниқланди. Мазкур ҳолат юзасидан Асака тумани ҳокимлиги матбуот хизмати олиб борилган ўрганиш натижаларини эълон қилди.
Қайд этилишича, Ғанчаюз кўчасида яшовчи, 1994 йилда туғилган фуқаро Ў.Д.ни 2020 йил 5 октябрь куни Асака туман тиббиёт бирлашмаси тасарруфидаги 2-сонли туғруқ уйига «қоғоноқ пардасининг туғруқдан олдин ёрилиши» ташхиси билан қабул қилинган. Уни шифокор акушер-гинеколог Ф.Хусанова ва доя Солиевалар кўрикдан ўтказган.
Беморда муайян туғруқ жараёни бўлмаганлиги сабабли назорат олиб бориш мақсадида хаста ҳомиладорлар бўлимига ётқизилган. Режа асосида лаборатор ва инструментал текширувлар ўтказилган. Кузатув давомида аёл ҳолати қониқарли деб баҳоланган. Орадан икки кун ўтиб ҳомиланинг номуайян холати (ишончсиз), қоғоноқ парданинг туғруқдан олдин ёрилиши, камқонлик ўрта оғир даражаси аниқланган.
Шундан сўнг, туғруқни жарроҳлик усули билан олиш учун оила аъзоларидан жарроҳлик муолажасига ёзма розилик олинган. Жарроҳлик муолажаси кесерча-кесиш усулида ўтказилган. Ўша куни кечқурун фарзанд дунёга келган ва амалиёт СМА орғиқсизлантирилиши йўли билан бажарилган. Асоратлар кузатилмаган. Жарроҳликдан сўнг бемор интенсив кузатув олиб бориш хонасига ўтказилиб, инфузион, антибактериал терапия олиб борилган.
«Орадан 10 ой ўтиб, 2021 йилнинг 16 август куни Асака туманидаги ШТЁБ бўлимига аёл ўткир битишмали ичак тутилиши ташхиси билан ёткизилган. У текширувлардан ўтказилиб, зудлик билан операцияга олинган. Амалиёт вақтида беморнинг ингичка ичагига ёт жисм тиқилиб қолганлиги аниқланган. Ёт жисм олинган ва у салфеткалиги аниқланган, ичак жароҳати тикилган», — дейилади хабарда.
Чувалчангсимон ўсимтаси иккиламчи яллиғланганлиги учун олиб ташланган. Операциядан кейинги давр тинч ўтган. Орадан 4 кун ўтиб, қониқарли холатда режали жарроҳлик бўлимига ўтказилиб, 28 август куни уйига кетишга рухсат берилган.
Аёл ва унинг фарзанди хозирда амалий соғлом, саломатлиги бўйича хеч қандай шикоят ва эътирозлари йўқ, дейилади хабарда.
Туман ҳокимлигининг қўшимча қилишича, операция вақтида видео келгусида шифокорлар орасида операция вақтида бундай қўпол хатоларга йўл қўймасликлари, шифокорлар ҳушёр бўлиши мақсадида олинган. Номаълум шахс эса уни тарқатиб юборган.
