2022 йил 1 май санасига кўра, Ўзбекистон олтин-валюта захиралари ўтган ойгига нисбатан 745 млн долларга ортиб, жами 35,9 млрд долларни ташкил қилмоқда. Бу Марказий банк тақдим қилган маълумотларда акс этган.

Унга кўра, захираларнинг валюта қисми март ойидаги кескин камайишдан кейин яна барқарорлашган ва апрель ойи билан солиштирганда ўсиш ҳажми 332 млн долларни ташкил қилган. Валюта захиралари ҳозирда 13,5 млрд долларни ташкил қилмоқда.

Бундан ташқари, олтин захиралари ҳам кўпайган — олтин ҳажмининг 345,24 кг га (10,9 млн дан 11,1 млн унциягача) ортгани сабабли, кўпайиш қиймати 444 млн долларни ташкил қилган. Ҳозирда захираларнинг олтин қисми 21,3 млрд долларни ташкил қилмоқда.

Қайд этилишича, ушбу захиралар мамлакатнинг йиллик импортидан (2021 йилда 25,5 млрд долларни ташкил этди) сезиларли даражада кўпроқдир. Ўз навбатида, халқаро ташкилотларнинг ривожланаётган мамлакатлар учун тавсияларига кўра, захиралар камида 3 ойлик импортни қоплаши керак.