18 майдан 19 майга ўтар кечаси Севилья шаҳридаги «Рамон Санчес-Писхуан» стадиони Европа лигаси финалига мезбонлик қилди. Унда Германиянинг «Айнтрахт Франкфурт» ва Шотландиянинг «Рейнжерс» клублари тўқнаш келди.

Ўйиннинг биринчи бўлимида иккала жамоа ҳам тенг устунликка эришди. Ҳисоб иккинчи бўлимга келиб очилди. «Рейнжерс» ярим ҳимоячиси Жо Арибо 57-дақиқада гол уриб, жамоасини олдинга олиб чиқди.

70-дақиқада эса «Айнтрахт» ҳужумчиси Рафаел Борре жавоб голини киритди. Қўшимча бўлимларда ҳам ғолиб аниқланмади, «пеналтилар» сериясида эса немис клубининг қўли баланд келди — Аарон Рэмзининг зарбасини Кевин Трапп қайтарди.

Аарон Рэмзи. Фото: Getty Images.

Шу тариқа, Германиянинг «Айнтрахт» клуби Европа лигаси ғолибига айланди. Немис жамоаси финалдаги ғалаба эвазига ўз тарихида илк бор Чемпионлар лигасига йўлланмани қўлга киритди. «Рейнжерс» эса Европа лигасидаги 2-финалини ҳам бой берди.

Маълумот учун «Айнтрахт» ўз тарихида 3-бор, 1942 йилда илк марта еврокубокларда ғолиб бўлди. Бунгача клуб Интертото (1967) ва УЕФА кубоги (1980) соҳибига айланганди. Франкфурт клуби 10 август куни Ҳельсинкида ўтадиган УЕФА суперкубогида «Реал» ёки «Ливерпуль»га қарши ўйнайди.

«Айнтрахт» — Европа Лигаси ғолиби. Фото: Getty Images

Европа лигаси тарихида биринчи марта кетма-кет икки финалда ўйин пенальтилар сериясигача етиб борди. Ўтган йилги финалда Испаниянинг «Вильярреал» жамоаси Англиянинг «Манчестер Юнайтед» клубини пенальтилар сериясида 11:10 ҳисобида мағлуб этиб, мусобақа чемпиони бўлганди.

Эслатиб ўтамиз, шу ойда яна иккита еврокубок финали бўлиб ўтади. 28 май куни Париждаги «Стад-де-Франс» ўйингоҳида УЕФА Чемпионлар лигаси финали ўтказилади. Унда Англиянинг «Ливерпуль» клуби Испаниянинг «Реал Мадрид» жамоасига қарши майдонга тушади. Ўз навбатида, ўзбекистонлик Элдор Шомуродов тўп сурадиган Италиянинг «Рома» клуби Европа Конференциялар лигаси финалида Нидерландиянинг «Фейеноорд» жамоаси билан куч синашади. Финал 25 май куни Албания пойтахти Тиранада бўлиб ўтиши режалаштирилган.