УЕФА Ижроия қўмитасининг Венада бўлиб ўтган йиғилишида 2024/25 йилги мавсумдан бошлаб еврокубокларнинг янги формати ва саралаш схемаси қабул қилинди. Формат «швейцарча тизим»да ўтказилади. Бу ҳақда ташкилот расмий сайти хабар берди.
Асосий ўзгаришлардан баъзилари — 2024/25 йилги мавсумдан бошлаб гуруҳ босқичи ўрнига 36 та клубдан иборат ягона лига ташкил этилади. Турнир энг камида 8 турдан иборат бўлиб, шундан сўнг энг яхши 24та жамоа плей-офф йўлланмасини қўлга киритади. Саккизта энг яхши натижага эга жамоа Чемпионлар лигасининг 1/8 финалига, қолган 16та жамоа — 9−24-ўрин эгалари 1/16 финалга йўлланма олиб, плей-оффда иккита ўйин ўтказади. Европа лигаси ва Конференциялар лигаси ҳам шу тизимда ўтказилади.
Хабарда айтилишича, Чемпионлар лигасининг саккиз тури 10 ҳафта давомида ўтказилади. Шу билан бирга, Чемпионлар лигаси, Европа лигаси ва Конференциялар лигаси баҳслари бир ҳафта ичида ўтказилади.
Иштирокчилар сони 32 дан 36 тага кўпайиши билан Чемпионлар лигасига тўртта қўшимча йўлланмалар қуйидагича тақсимланади:
- УЕФА миллий ассоциациялари рейтингида бешинчи ўринни эгаллаган ассоциация чемпионатида учинчи ўринни эгаллаган клубга битта ўрин берилади;
- Бир ўрин «Чемпионлар йўли» орқали квалификациядан ўтадиган жамолар сонини тўрттадан бештага ошириш орқали қўшилади;
- Қолган икки ўрин олдинги еврокубоклар мавсумида энг яхши ўртача балл тўплаган ассоциацияларга берилади.
«УЕФА спортнинг асосий қадриятларини ҳурмат қилиш ва спорт маҳоратига асосланган мусобақаларда очиқлик тамойилини ҳимоя қилишга тўлиқ содиқ эканлигини кўрсатди. Ишончимиз комилки, танланган формат ҳалол мувозанатни таъминлайди, рақобатбардошликни оширади ва кейинчалик клубларга тақсимлаш учун катта даромад келтиради, шу билан бирга, Европадаги жамоаларнинг мусобақалардаги иштироки уларнинг жозибадорлиги ва машҳурлигини оширади», — деди УЕФА президенти Александер Чеферин.
Шунингдек, УЕФА Ижроия қўмитаси бутун Европа бўйлаб ички мусобақалар тақвими муҳимлигини эътироф этиб, финалгача бўлган барча ўйинлар ҳафта ўртасида ўтказилишини тасдиқлади.
Эслатиб ўтамиз, бу йил УЕФА Чемпионлар лигаси финалида Англиянинг «Ливерпуль» клуби Испаниянинг «Реал Мадрид» жамоасига қарши майдонга тушади. Финал ўйини 28 май куни Париждаги «Стад-де-Франс» ўйингоҳида бўлиб ўтади. Европа лигаси финалида эса Шотландиянинг «Рейнжерс» клуби Германиянинг «Айнтрахт» жамоаси билан тўқнаш келади. Беллашув 18 май куни Севильядаги «Рамон Санчес Писхуан» стадионида ўтказилади. Ўз навбатида, ўзбекистонлик Элдор Шомуродов ҳаракат қиладиган Италиянинг «Рома» клуби Европа Конференциялар лигаси финалида Нидерландиянинг «Фейеноорд» жамоаси билан куч синашади. Финал 25 май куни Албания пойтахти Тиранада бўлиб ўтиши режалаштирилган.
