Роман Абрамович «Челси» футбол клубини америкалик ва швейцариялик тадбиркорларга сотиш бўйича келишувга эришди. Бу ҳақда клуб матбуот хизмати хабар бермоқда.

«Челси» баёнотида клубнинг Тодд Боэли, Марк Уольтер ва Ҳансйорг Висс бошчилигидаги янги эгаларига сотилаётгани тасдиқланган.

Telegraph` нашрининг ёзишича, битим суммаси 4,25 млрд фунтни ташкил этади. Энди келишувни Британия ҳукумати ва Англия Премьер-лигаси раҳбарияти тасдиқлаши керак.

Жами киритиладиган сармоянинг 2,5 млрд фунт стерлинги клуб акцияларини сотиб олиш учун сарфланади. Клуб ўз хабарида тушум Роман Абрамович айтгани каби 100% хайрия қилиш ниятида Буюк Британиядаги музлатилган банк ҳисоб рақамига ўтказилади. Музлатилган банк ҳисобварағидан пул ўтказиш учун Буюк Британия ҳукуматининг розилиги талаб қилинади.

Бундан ташқари, яна 1,75 млрд фунт стерлинг пул клуб манфаати учун кейинги сармояга ажратилади. Бу орқали «Стемфорд-Бридж» стадиони, академия, аёллар жамоаси, «Кингсмедоу» стадиони ва клуб жамғармаси давомий молиялаштирилади.

Клуб сотилиши май ойининг охирида барча зарурий меъёрий тасдиқлардан сўнг якунланиши кутилмоқда, дейилади хабарда.

Клубнинг янги эгалари:

  • Тодд Боэли (америкалик) штаб-квартираси АҚШдаги Коннектикут штатининг Гринвич шаҳрида жойлашган «Eldridge Industries» холдинг компаниясининг асосчиси, раиси, бош ижрочи директори ҳисобланади. Унинг бугунги кундаги соф бойлиги 4,5 млрд долларга тенг.
  • Марк Уолтер (америкалик), Лос-Анжелеснинг «Доджерс» клубининг асосий эгаси. Унинг бойлиги 3,9 млрд долларга тенг.
  • Хансйорг Висс (швейцариялик) тиббиёт соҳасида ўз бойлигини орттирган. Униннг бойлиги 5 млрд долларга тенг.

Эслатиб ўтамиз, «Газета.uz» аввалроқ Роман Абрамовичнинг март ойи бошида клубни сотишга қарор қилгани ва тушган соф даромаднинг ҳаммасини Украинадаги урушнинг барча қурбонларига ёрдам бериш учун сарфлаши ҳақида ёзган эди.