Беларусь Республикасининг биринчи президенти Станислав Шушкевич Минскда 88 ёшида коронавирус асоратларидан вафот этди, дея хабар берди БЕЛТА.

У 1991 йил октябрь ойидан 1994 йил январь ойига қадар Беларусь Олий кенгашининг раиси лавозимида фаолият олиб борган ва 1991 йил 8 декабрь куни Совет Иттифоқи тугатилиши ва МДҲ ташкил этилиши бўйича келишув имзоланган Беловеж ўрмонидаги музокараларда беларус томонинининг вакили бўлган эди.

1994 йилги президентлик сайловларида Станислав Шушкевич Александр Лукашенко ва бошқа яна иккита номзодларга бой бериб, тўртинчи ўринни эгаллаган эди.

Станислав Шушкевич 1934 йилда Минск шаҳрида таваллуд топган, Беларусь давлат университетининг физика-математика факультетини битирган. 1970 йилда физик ва математик фанлар доктори унвонини олган ва 1971 йилдан ўз университетида ядровий физик кафедрасига мудир бўлган. 1982 йилда унга илм-фан ва техника соҳасида хизмат кўрсатган арбоб мақоми берилган эди. 1986 йилда Чернобиль АЭСдаги авария оқибатларини ўрганиш бўйича махсус комиссия таркибига кирган.

2021 йилда Deutsche Welle нашрига берган интервьюсида Станислав Шушкевич Беловеж келишувларини «бемалол конфедерация деб атаса бўладиган янги тузилма ҳақидаги шартнома» дея таърифлаган эди ва ўз ишини виждонан амалга оширганлиги ҳамда ҳеч нарсадан афсусланмаслигини билдирган эди.

Шунингдек, у СССР халқлар қамоқхонаси бўлганлиги, ва айнан шу мамлакатнинг парчаланиб кетишига олиб келганлиги ҳақида фикр билдирган эди. «СССР расмийлари ўнта халқни ўз ҳудудларидан қувишган ҳамда Қозоғистон ва Ўзбекистоннинг кимсасиз ҳудудларига ташлашган», — деган эди у. Иккинчи сабаб сифатида у барча республикаларнинг ва баъи автономияларнинг давлат суверенитети ҳақидаги декларацияларини қўллаб-қувватламаслик нотўғри бўлишини кўрсатган эди.

Беларусь давлатининг ривожланиш йўли ҳақидаги саволга жавоб берар экан, у мамлакатдаги вазиятни қуйидагича изоҳлаган эди: «Ҳокимиятни эгаллаган одамлар учун ҳокимият наркотик бўлиб қолди. Улар фақат сурбетларча ҳукм суришни билишади, бошқаришни эмас».

2020 йилда Станислав Шушкевич Александр Лукашенко ҳокимиятига мухолифатчи бўлган турмуш ўртоқлар Сергей ва Светлана Тихановскийларни қўллаб-қувватлаши ҳақида фикр билдирди. Сергей Тихановский 2020 йил баҳорида қамоққа олинган эди ва 2020 йил майидан бери сиёсий маҳбус саналади. Светлана Тихановская 2020 йил августида халқ намойишлари, намойишчиларнинг қўлга олиниши ва мухолифатга қарши репрессиялардан сўнг мамлакатни тарк этган эди.