Ўзгидрометнинг ҳафта давомида кузатиладиган об-ҳаво ҳақида маълумотига кўра, бу ҳафтада ҳаво ўзгарувчан бўлади.
Жума ва шанба куни Ўзбекистон ҳудудининг катта қисмида ҳаво ўзгариб туради, ёғингарчилик кутилмайди. Фақат Самарқанд, Жиззах вилоятларининг айрим туманларида 28 апрель кундуз куни, Тошкент вилояти ва Фарғона водийсида баъзи жойларда шанба куни кечаси ва эрталаб қисқа муддатли ёмғир ёғиши, момақалдироқ бўлиши мумкин.
1−2 майда республика ҳудудига Эрон ҳудудларидан май ойининг боши учун анча жуда иссиқ бўлган ҳаво кириб келиши кучаяди. Кундуз кунлари ҳаво +32…+34 даражагача, республика жанубида +36…+39 даражагача исийди.
Бундай ҳарорат фони метеорологик кузатувларнинг барча йиллари учун ушбу даврнинг энг юқори ҳароратидан фақат 2−3 даражага паст бўлади. Шу кунларда фақат республиканинг шимоли-ғарбий ҳудудларида қисқа муддатли ёмғир ёғиши мумкин. Қолган ҳудудларда қуруқ ва асосан кам булутли об-ҳаво бўлиши кутилмоқда, дейилади хабарда.
3−4 майда Ўзбекистон ҳудудига Волга бўйи ҳудудларидан нам ва нисбатан салқин ҳаво массалари кириб келиши кутилмоқда. Маълумотларга кўра, келаётган сешанба ва чоршанба кунлари республика бўйича вақти-вақти билан қисқа муддатли ёмғир ёғади, момақалдироқ бўлиши мумкин.
Республиканинг тоғ олди ва тоғли ҳудудларида баъзи жойларда ёмғир кучайиши эҳтимоли бор. Баъзи жойларда шамол 17−22 м/с гача кучайиши кутилмоқда, 3 майда баъзи жойларда чанг тўзонлари кузатилиши мумкин. Кундузи ҳаво ҳарорати +22…+25 даражагача пасаяди.
