Дунёнинг 12 та мамлакатида жами 169 киши келиб чиқиши номаълум бўлган гепатитга чалинди — ЖССТ
2022 йил 21 апрель ҳолатига кўра, Европа минтақасидаги 11 давлатида ва Америка минтақасининг бир давлатида келиб чиқиши номаълум бўлган камида 169 та ўткир гепатит ҳолати қайд этилган, дейилади ташкилотнинг ўз веб-сайтида эълон қилинган баёнотида. Бундан ташқари, бир кишининг ўлими ҳам тасдиқланди.
Касалликлар қайд этилган мамлакатлар: Буюк Британия ва Шимолий Ирландия — 114, Испания — 13, Исроил — 12, Америка Қўшма Штатлари — 9, Дания — 6, Ирландия — 5, Нидерландия ва Италия 4 нафардан, Норвегия ва Франция 2 нафардан, Руминия ва Бельгияда 1 нафардан бемор.
ЖССТ маълумотларига кўра, ҳеч бир ҳолатда гепатит A, B, C, E ва D вируслари аниқланмаган. Касаллик 1 ойликдан 16 ёшгача бўлган болаларда аниқланган. Беморларнинг тахминан 10 фоизи жигар трансплантациясига муҳтож.
Уруш бошлангандан бери Украинада 213 нафар бола ҳалок бўлгани айтилди
Украинада 2022 йил 24 апрель тонг ҳолатига кўра, уруш бошланганидан бери 213 нафар бола ҳалок бўлган, 389 нафардан ортиқ болалар жароҳатланган. Бу ҳақда Украина бош прокуратураси хабар берди.
Хабарга кўра, Россиянинг Украинадаги ҳарбий ҳаракатлари туфайли мамлакатда 1500 та таълим муассасаси зарар кўрган. Уларнинг 102 таси бутунлай вайрон бўлган.
Францияда президентлик сайловларининг иккинчи тури бошланди
Бугун, 24 апрель куни Францияда президентлик сайловларининг иккинчи босқичи бошланди. Бу ҳақда Коммерсантъ нашри хабар берди.
Эммануэл Макрон ва Марин Ле Пен. Фото: CNN
Эслатиб ўтамиз, сайловнинг биринчи босқичи 10 апрель куни бўлиб ўтганди.
Кун якунида (Европа вақти билан соат 20:00 да) яқин беш йил ичида мамлакатни ким бошқариши маълум бўлади: амалдаги президент Эммануэль Макронми ёки «Миллий бирлашув»дан номзод Марин Ле Пен. 2017 йилда Эммануэл Макрон иккинчи турда 66,10 фоиз овоз олиб, Марин Ле Пенни ортда қолдириб, республика президенти этиб сайланганди.
Болгария Украинага қурол сотишдан бош тортди
Украинага қурол етказиб бериш масаласи Болгарияда мамлакат ҳукумати аъзолари ўртасида тортишувларга сабаб бўлди, шу муносабат билан ҳукмрон коалиция қурол етказиб беришдан бош тортишга қарор қилди, деб хабар берди Bloomberg.
Агентлик маълумотларига кўра, мамлакат расмийлари Европа Иттифоқи давлатларининг Украинага қурол етказиб беришда ёрдам бериш ҳақидаги чақириқларига жавоб бермаган.
Маълум бўлишича, Болгария социалистик партияси, агар расмийлар Киевга қурол-яроғ етказиб беришни маъқулласа, ҳукмрон коалициядан чиқиш билан таҳдид қилган. Шу билан бирга, ўнг марказчи Болгария демократик партияси, агар қурол етказиб берилмаса, коалицияни тарк этишини маълум қилган.
ЕИнинг ўнта давлати компаниялари эмбаргони айланиб ўтиб Россияга қурол сотган — The Telegraph
Европа Иттифоқининг (ЕИ) камида 10 та давлати компаниялари қурол савдоси эмбаргосини четлаб ўтиб, Россияга қарийб 350 млн евролик ҳарбий техника экспорт қилган, деб ёзади Европа Иттифоқи маълумотларига таяниб The Telegraph нашри.
Умумий таъминотнинг тахминан 78 фоизи Германия ва Франция компанияларига тўғри келади. Улар Россияга 273 млн евролик ҳарбий техника етказиб беришган. ЕИ маълумотларига кўра, ҳозирда бу техника Украинада қўлланилмоқда. Шунингдек, Россияга Австрия, Болгария, Буюк Британия, Италия ва Чехия компаниялари ҳам қурол етказиб берган.
Германия ва Франция 2014 йилда Қрим Россияга қўшиб олинганидан кейин Россияга қурол-яроғ етказиб бериш тақиқланганига қарамай, Россияга техника, бомба, ракета, снаряд ва қурол-яроғ жўнатишган, дейилади хабарда.
Немис компаниялари ЕИнинг Россияга қурол эмбаргосидаги заиф нуқтасидан фойдаланиб, Москвага 121 млн евролик ускуналар, ўқотар қуроллар ва зирҳланган техника сотгани айтилди. Шунингдек, Франция компанияларининг 76 та экспорт лицензияси доирасида 152 млн евролик ҳарбий юкларни Россияга юборгани аниқланган.
Париж экспортёрларнинг 2014 йилгача тузилган шартномаларни амалга оширишига рухсат берган ва бу орқали ЕИнинг эмбаргосини четлаб ўтган. Франция фирмалари бомбалар, ракеталар ва торпедолар билан бир қаторда мингдан зиёд Россия танклари учун махсус камералар, шунингдек қирувчи самолётлар ва ҳаводан зарба йўлловчи вертолётлар учун навигацион тизимлар етказиб бергани маълум қилинди.
Колумбия ҳукумати Венесуэла ҳарбийларига ҳужум қилишни режалаштирмоқда — Венесуэла президенти
Венесуэла президенти Николас Мадуронинг фикрича, Колумбия президенти Иван Дуке вазиятни беқарорлаштириш мақсадида қўшни давлатга ҳужум қилишдан манфаатдор. Бу ҳақда Коммерсантъ нашри маълум қилди.
У барча вазирларни, шунингдек, губернаторлар ва мэрларни «Колумбия наркоҳукуматидан келиб чиқадиган зўравонлик режаларини зарарсизлантириш ва йўқ қилиш учун ҳушёр бўлишга» чақирди. Венесуэла президенти, шунингдек, бундай ҳаракатлар мамлакат энергия ва сув таъминоти тизимларининг ишини бузишга қаратилган бўлиши мумкинлигини таъкидлади. Николас Мадуро мамлакат разведка хизматлари бу режаларни зарарсизлантиришга тайёр бўлишига ишонтирди.
Нигерияда ноқонуний нефтни қайта ишлаш заводидаги портлаш оқибатида 100 киши ҳалок бўлди
Нигериянинг Имо штатида ноқонуний фаолият олиб борадиган нефтни қайта ишлаш заводида юз берган портлаш оқибатида 100 нафардан зиёд одам ҳалок бўлди. Бу ҳақда Reuters хабар берди.
«Портлаш ноқонуний бункер майдончасида содир бўлган, оқибатда 100 нафардан зиёд киши таниб бўлмайдиган даражада куйиб, ҳалок бўлган», — деб баёнот берган Нигерия нефть ресурслари бўйича давлат комиссари Гудлак Опия.
Владимир Зеленский якшанба куни Киевга АҚШ давлат котиби ва Мудофаа вазири келишини айтди
Владимир Зеленский АҚШ Давлат котиби Энтони Блинкен ва Мудофаа вазири Ллойд Остин 24 апрель куни Киевга ташриф буюришини маълум қилди. Бу ҳақда Meduza нашри хабар берди. Оқ уй ушбу маълумот бўйича изоҳ беришдан бош тортган.
БМТ раҳбари Москва ва Киевга ташриф буюради
БМТ Бош котиби Антониу Гутерриш келаси ҳафта Москва ва Киевга ташриф буюради, дея хабар беради БМТ ахборот хизмати. «[Антонио Гутерриш] Украинада тинчликни зудлик билан тиклаш масаласини муҳокама қилишни интиқлик билан кутмоқда», — деди БМТ матбуот котиби Эри Канеко.
26 апрель куни БМТ раҳбари Москвада ташқи ишлар вазири Сергей Лавров билан ишчи учрашув ва тушлик ўтказади, сўнгра уни президент Владимир Путин қабул қилади.
28 апрель куни БМТ Бош котиби Украина ташқи ишлар вазири Дмитрий Кулеба билан ишчи учрашув ўтказади ва уни президент Владимир Зеленский қабул қилади.
Мариуполда драма театри вайроналарини текшириш пайтида 11 кишининг жасади топилгани айтилди
Донецк Халқ Республикаси (ДХР) Фавқулодда вазиятлар вазирлиги қутқарувчилари кўнгиллилар билан биргаликда тўрт кун ичида Мариуполдаги драма театри вайроналари остидан 11 нафар ҳалок бўлган тинч аҳолининг жасадини олиб чиқди. Бу ҳақда вайроналарни таҳлил қилишда иштирок этаётган Фавқулодда вазиятлар вазирлиги ходимига таяниб, ТАСС маълум қилди.
Хабарга кўра, вайроналар остида ҳали ҳам жасадлар бор. Шу билан бирга, бинонинг концерт зали жойлашган қисмида ҳали иш бошланмаган. Маълумотларга кўра, бу жой портлашнинг эпицентри бўлган.
