21 апрель куни Сирдарё вилоятининг Янгиер шаҳрида «А.Жомий» МФЙдаги Nexia-3 автомобилининг газ баллони портлаб кетди. Бу ҳақда Фавқулодда вазиятлар вазирлиги матбуот хизмати хабар қилди.
Дастлабки маълумотларга кўра, воқеа соат 09:50 ларда Мудофаа вазирлиги тизимидаги «Ватанпарвар» ташкилоти биноси рўпарасида содир бўлган.
Фуқаро Б. Қ.га (1994 йилда туғилган) тегишли Nexia 3 русумли автомобилининг газ баллони ёрилган ва натижада автомобиль буткул яроқсиз ҳолга келган. Унинг ёнидаги 2 та автотранспорт воситаларига эса техник зарар етган. Шунингдек, машина яқинида бўлган чойхонанинг 10 кв м майдонда ойнаси синиб, зарарланган.
Воқеа жойида ёнғин содир бўлмаган, ҳеч ким тан жароҳати олмаган.
Ҳозирда вилоят ФВБ ва ИИБ ЙҲХБ ходимлари дастлабки суриштирув ишлари олиб бормоқда.
