Фарғона ва Наманган вилоятларида фуқароларни ўқишга киритиб қўйиш билан боғлиқ фирибгарликлар аниқланди, дея хабар бермоқда Бош прокуратура ҳузуридаги Департамент матбуот хизмати.
Унга кўра, Департаментнинг Олтиариқ туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбир давомида фуқаро Ш. Ғ. бошқа бир фуқаро Ш. ни қўшни Қирғизистондаги олий таълим муассасаларининг бирига танишлари орқали ўқишга киритиб қўйиш ва 1-курсини тугатганлиги тўғрисида маълумот қилдириб бериш эвазига 1100 АҚШ долларини олган вақтида ашёвий далиллар билан ушланган.
Бундан ташқари, Департаментнинг Наманган вилоят бошқармаси томонидан ўтказилган терговга қадар текширувда, фуқаролар Ё. Т., Р. Б. ва бошқалар фуқаро С. О.ни Жалолобод давлат университетига ўқишга киритиб, кейинчалик Наманган давлат университетининг «Ҳуқуқшунослик» факультетига кўчириб бериш эвазига 1580 доллар ва 26 млн сўмини қўлга киритишган. Шундан 200 долларини қайтаргани, шунингдек фуқаро Х.И.нинг ўқишини қўшни Қирғизистондан Наманган муҳандислик-технология институтига кўчириб бериш эвазига 3000 долларини олиб, шундан 200 долларини қайтаргани аниқланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ, фуқарони Қозоғистонда ўқигани тўғрисидаги сохта ҳужжат билан СамДУ 2-курсига киритмоқчи бўлган шахс ушлангани ҳақида ёзган эдик.
