АҚШнинг General Motors автоконцерни Россиядан чиқиб кетади, дея хабар берди Коммерсантъ. Компания Россиядаги офиси ходимларини ишдан бўшатади.

Шунингдек, GM ушбу давлатдаги дилерларига автомобиллар ва эҳтиёт қисмлар етказиб бериш тўхтатилгани ҳақида хабар юборган.

Компания Украинадаги ҳарбий ҳаракатлар бошланганидан кейин Россияни бутунлай тарк этаётган биринчи хорижий автоконцерн бўлди.

Сўнгги ҳафталарда GM АҚШ регуляторидан тушунтиришларни кутаётган эди. Ушбу тушунтиришлар олинганидан сўнг компания ҳақиқатан ҳам Россия бозорини тўлиқ тарк этишини маълум қилди.

Компания дилерлик марказларига киритилган инвестицияларни қоплаб бермаслигини эълон қилди. Россиядаги дилерлик марказлари яқинда экспортёрнинг янги талабларига мувофиқ қайта ўзгартирилган. Россия ОАВининг ёзишича, GM 2015 йилда мамлакатда ишлаб чиқаришни қисқартирганида дилерлик марказларининг зарарларини қисман қоплаган.

GM Россия бозорини тарк этаётганини тасдиқлади. 19 апрель куни кечқурун Cadillac пресс-порталида пайдо бўлган хабарга кўра, Украинадаги инқироз ва «бу билан боғлиқ АҚШ ва халқаро санкциялар туфайли GM Россиядаги операцияларни тўхтатиш чораларини кенгайтиришга қарор қилди». Қайд этилишича, GM 28 февраль куни Россияга автомобиллар экспорти ва тижорат фаолиятини тўхтатган: вазиятнинг ёмонлашаётганини ҳисобга олиб, компания Россиядаги фаолиятини тўхтатиб туриш муддатини узайтиришга қарор қилган.

Эслатиб ўтамиз, аввалроқ GM гуруҳининг Chevrolet автомобилларини ишлаб чиқарувчи UzAuto Motors санкциялар режимига амал қилиш доирасида 9 мартдан бошлаб Россияга автомобиль сотишни тўхтатгани ҳақида хабар берилган эди. UzAuto Motors вазият юзасидан «Газета.uz» сўровига изоҳ беришдан бош тортган.