Ўзбекистон Яманда БМТ воситачилигида икки ойлик сулҳ ва ўт очишни тўхтатиш эълон қилинганини олқишлайди. Тегишли баёнот мамлакат Ташқи ишлар вазирлиги томонидан эълон қилинди.
«Ҳарбий ҳаракатларга вақтинчалик мораторий, шунингдек, ушбу мамлакатда қонунийликни таъминлаш учун кўрсатилган қатъият Яманда кенг қамровли тинчлик ва барқарорликни ўрнатиш йўлида муросага эришиш учун зарур шарт-шароитларни яратади деб ҳисоблаймиз», — дейилади баёнотда.
«Биз барча курашаётган томонларни ихтилофни мулоқот ва дипломатик йўл билан ҳал қилиш учун вазмин бўлишга ва сиёсий ирода кўрсатишга чорлаймиз», -дея қайд этди ТИВ.
БМТ материалларига кўра, етти йилдан ортиқ вақтдан бери Яманда Саудия Арабистони бошчилигидаги ҳукуматпараст коалиция ва исёнчи ҳутий гуруҳлари ўртасида қуролли қарама-қаршилик давом этмоқда.
Яманда икки ойлик сулҳ ҳақидаги келишув 1 апрель куни имзоланган эди. Томонлар Яман ичида ва унинг чегаралари яқинида ҳаво, қуруқлик ва денгиздаги барча ҳужум операцияларини тўхтатишга келишиб олдилар.
Улар, шунингдек, ёнилғи ортилган кемаларнинг Ҳудайда портига кириши ва Сана аэропортида тижорат рейсларини амалга оширишга ҳам келишиб олдилар.
Томонларнинг розилиги билан сулҳ икки ойлик муддатдан кейин узайтирилиши мумкин.
