Давлат хавфсизлик хизматининг ҳудудларда ўтказилган тезкор тадбирлари давомида гиёҳванд моддалар ва кучли таъсир этувчи дори воситаларининг савдосига чек қўйилди, деб хабар берди ДХХ матбуот хизмати.

Жумладан, ДХХнинг Наманган вилояти бўйича бошқармаси ходимлари томонидан вилоят ички ишлар ҳамда божхона бошқармалари билан ҳамкорликда ўтказилган тезкор тадбирда «Самарқанд-Наманган» йўналишида ҳаракатланаётган «Ласетти» русумли автомашина Чуст тумани ҳудудида тўхтатилиб, текширилди.

Натижада, унда йўловчи сифатида кетаётган, Самарқанд шаҳрида яшовчи, 1968 ва 1991 йилларда туғилган 2 фуқаронинг ёнида 1 кг 470 гр. «гашиш» моддаси борлиги аниқланиб, процессуал тартибда расмийлаштириб олинди.

Фото: ДХХ

Учинчи шахслар томонидан Тожикистондан мамлакат ҳудудига ўтказилган ушбу наркотикларни Наманган шаҳрига олиб бориб беришлари эвазига, мазкур 2 фуқаронинг ҳар бирига 1 млн сўмдан пул берилиши ваъда қилинган.

Бошқа бир ҳолатда эса Наманган шаҳрида яшовчи, муқаддам гиёҳванд моддалар савдоси билан боғлиқ жиноят содир этганлиги учун судланган шахс (1978 й.т.) бошқарувидаги «Лада» русумли автомашина вилоят марказида тўхтатилиб текширилганда, унинг салонида 931 гр «гашиш» моддаси борлиги аниқланган ва тегишли тартибда расмийлаштириб олинган.

Шунингдек, у қирғизистонлик наркокуръер томонидан мамлакат ҳудудига ўтказилган мазкур моддани Янгиқўрғон туманида истиқомат қилувчи, муқаддам гиёҳванд моддалар савдоси билан боғлиқ жиноят содир этгани учун судланган шахсдан (1974 й.т.) олгани аниқланди ҳамда у ҳам ушланди.

Наманган шаҳридаги автотураргоҳлардан бирида маҳаллий фуқаро (1984 й.т.) 1568 дона «Регапен» кучли таъсир қилувчи дори воситасини 1600 АҚШ долларига сотаётган вақтида қўлга олинди.


Хизмат ходимлари томонидан божхона органлари ходимлари билан ҳамкорликда Тошкент шаҳрида ҳам бир нечта тезкор тадбирлар ўтказилди.

Хусусан, Сурхондарё вилоятида яшовчи, 1989 ва 1992 йилларда туғилган 2 фуқаро 496 гр «гашиш» моддасини келгусида сотиш мақсадида Тошкент шаҳрига олиб келган вақтларида Чилонзор туманида ушланди.

Яшнобод туманида ўтказилган тезкор тадбирда фуқаро (1991 й.т.) 1680 дона «Регапен» кучли таъсир қилувчи дори воситаларини 30 млн сўмга, Бектемир туманида қайд этилган ҳолатда эса муқаддам судланган шахс (1991 й.т.) 133 дона «Регапен» ва 43 дона «Тропикамид» кучли таъсир қилувчи дори воситаларини 12 млн сўмга сотаётган вақтларида қўлга олинди.

Бу йўналишда ДХХ Сирдарё вилояти бўйича бошқармаси ходимлари ҳам вилоят ИИБ билан ҳамкорликда тезкор тадбир ўтказгани маълум қилинди.

Хусусан, «Фарғона-Сирдарё» йўналишида ҳаракатланиб келаётган, Гулистон шаҳрида яшовчи шахс (1991 й.т.) бошқарувидаги «Жентра» русумли автомашина «Сайхунобод» ЙПХ масканида тўхтатилиб текширилганда, унда 242 дона «Тропикамид» ҳамда 78 дона «Трамадол» кучли таъсир қилувчи дори воситалари борлиги аниқланиб, тегишли тартибда расмийлаштириб олинди.

Шунингдек, тезкор тадбир давом эттирилиб, автомашинада йўловчи сифатида кетаётган муқаддам судланган шахснинг (1992 й.т.) Гулистондаги яшаш манзилидан 406 дона «Регапен» ва 56 дона «Тропикамид» кучли таъсир қилувчи дори воситалари олинди.

Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.