Буюк Британия бош вазири Борис Жонсон 9 апрель куни эълон қилинмаган ташриф билан Украинага келди ва у ерда президент Владимир Зеленский билан учрашди. Буюк Британия бош вазири Киевга Польшадан поездда етиб келди.
Музокаралардан сўнг Зеленский ва Жонсон Киев марказини айланиб чиқишди. Украина президенти девонининг хабарида улар кутилмаган совғалар олгани айтилади: «Ўткинчи шахс президент ва Британия ҳукумати раҳбарига яқинлашиб, сопол хўрозлар совға қилди. Прокоп Бидасюк ижодига мансуб мазкур хўроз Киев вилояти, Бородянка қишлоғида рус қўшинлари томонидан вайрон қилинган кўп қаватли бинода омон қолган ошхона жавонида турарди. Бу жавондаги хўроз сурати интернетда машҳур бўлиб, украин халқининг қатъияти рамзига айланди».
Учрашув якунида Борис Жонсон Буюк Британия «Украинанинг Россиянинг шафқатсиз ва асоссиз босқинига қарши дадил курашини қўллаб-қувватлаш ҳамда унинг узоқ муддатли хавфсизлиги ва фаровонлигини таъминлаш учун қўлидан келган барча ишни қилишини» тасдиқлади.
Буюк Британия, хусусан, Украинага 100 млн фунт стерлинглик юқори аниқликда бошқариладиган ҳарбий техника, жумладан Starstreak зенит-ракеталари, 800 та танкка қарши ракеталар ва юқори аниқликда бошқариладиган ўқ-дориларни, шунингдек, тунги кўриш скуналари, тана зирҳлари ва шлемларни топширишни режалаштирмоқда.
Борис Жонсон шунингдек, Киевга қўшимча 120 та зирҳли техника ва янги кемага қарши ракета тизимларини юборишга ваъда берди. Шунингдек, Киев Жаҳон банкидан қўшимча 500 млн долларлик кредит кафолати олади.
Буюк Британия бош вазири, шунингдек, унинг мамлакати ҳамкорлар билан биргаликда активларни музлатиш ва олигархларга қарши санкциялар билан чекланиб қолмасдан, ҳар ҳафта иқтисодий босимни кучайтириб, Россияга қарши санкцияларни кучайтиришини айтди.
