Россия банки (Марказий банк) директорлар кенгаши 11 апрелдан бошлаб асосий ставкани — тарихий 20 фоиздан 17 фоизга камайтиришга қарор қилди, дейилади регулятор баёнотида.
«Россия иқтисодиёти учун ташқи муҳит қийинлигича қолмоқда ва иқтисодий фаолликни сезиларли даражада чекламоқда. Молиявий барқарорлик учун хавфлар сақланиб қолмоқда, аммо бугунги кунда улар, жумладан, капитал ҳаракатини назорат қилиш бўйича кўрилаётган чора-тадбирлар туфайли ўсишни тўхтатди», — дейилади Марказий банк хабарида.
Регулятор маълумотларига кўра, муддатли депозитлар бўйича маблағларнинг барқарор оқими кузатилмоқда. Бундан ташқари, йиллик инфляция базавий таъсир туфайли ўсишда давом этади, бироқ Марказий банкнинг сўнгги ҳафталик маълумотлари жорий нархларнинг ўсиш суръатлари, шу жумладан рубль курси динамикаси туфайли сезиларли даражада пасайганлигини кўрсатади.
Асосий ставкани 20 фоизга ошириш тўғрисидаги қарор Россия банки томонидан 28 февраль куни режадан ташқари йиғилишда қабул қилинган. Бунгача бу кўрсаткич 9,5% эди. Қарор Россияга, жумладан мамлакатнинг хориждаги энг йирик банклари ва валюта захираларига қарши бир неча марта жорий этилган қаттиқ санкциялардан сўнг қабул қилинди. 18 март куни бўлиб ўтган директорлар кенгашининг режалаштирилган йиғилишида Россия Марказий банки курсни ўзгаришсиз қолдирди.
«Пул-кредит шарт-шароитларининг қаттиқлашиши ҳукумат ва Россия Марказий банкининг кредит дастурларини қўллаб-қувватлаш дастури билан қисман қопланди, аммо, умуман олганда, инфляцияга қарши рискларни чеклаш давом эттирилади», — деб таъкидлайди регулятор.
Бугунги қарор истеъмол нархлари ўсишининг тезлашиши, иқтисодий фаолликнинг секинлашуви ва молиявий барқарорликка таъсир этувчи хатарларнинг мувозанатлашувини акс эттиради, дейилади ҳисоботда.
Шу билан бирга, Россия банки кейинги йиғилишларда ставкаларни янада пасайтиришга рухсат беради. Кейинги учрашув 29 апрелга белгиланган.
Марказий банк капитал назорати ва валюта чекловларини жорий қилганидан сўнг, март ойида Москва биржасида валюта савдолари ҳажми 2008 йилдаги даражага тушиб кетди ва 8 апрелда курс бир доллар учун 75,9 рублгача мустаҳкамланди, деб ёзади РБК.
Шундай қилиб, импорт февраль-март ойларига қараганда арзонлашди, бу эса инфляцияга таъсир қилади. Айниқса, импорт қилувчилар учун доллар курси айирбошлаш курсига яқин эканлигини ҳисобга олганда: март ойининг охирида Россия банки кредит ташкилотларига чет эл валютасини импортчиларга валюта курсидан максимал фарқ — 2 рублдан ошмаган ҳолда сотишни тавсия қилди. Бошқа компаниялар учун фарқ камида 10 рубль даражасида бўлиши тавсия этилади.
26 мартдан 1 апрелгача Россияда истеъмол нархлари 0,99 фоизга ошди, деб хабар берди Росстат. Инфляция олдинги тўрт ҳафта билан солиштирганда, яъни, аслида, қаттиқ санкциялар бошланганидан бери биринчи марта секинлашди. Иқтисодий ривожланиш вазирлиги маълумотларига кўра, йиллик ҳисобда инфляция 2021 йил охирида 8,39 фоизга баҳоланган бўлса-да, 16,7 фоизни ташкил этмоқда.
