6 апрель куни АҚШ, Европа Иттифоқи ва G7 давлатлари ҳамда Буюк Британия Россияга нисбатан янги санкцияларни эълон қилди.

Унга кўра, Россиянинг «Сбербанк» ва «Альфа-банк"ка нисбатан блокловчи санкциялар қўлланилади. Мазкур чекловлар санкцияга тушган банкларнинг активлари музлатилиши, АҚШ молия тизими ва америкалик шахсларга улар билан бизнес юритишига тақиқ қўйилишини англатади.

Жумладан, «Альфа-банк»нинг 5 та кемаси ҳамда 6 та шўба компаниясига, «Сбербанк»нинг 42 та шўба корхоналари ҳамда филиалларига нисбатан чекловлар қўлланилади.

Қайд этилишича, «Сбербанк» — Россия банк сектори умумий активларининг қарийб учдан бир қисмини эгаллайди ва Россия иқтисодиёти учун тизимли аҳамиятга эга. «Альфа-банк» — Россиянинг энг йирик хусусий банки ва Россиянинг тўртинчи йирик молиявий институти ҳисобланади.

Янги санкциялар Россияга инвестиция киритишни тақиқлашни ҳам ўз ичига олади. Шунингдек, Россиянинг муҳим давлат корхоналарига тўлиқ блокировка қилувчи санкциялар қўлланилади. Бу ҳар қандай америкалик шахснинг ушбу ташкилотлар билан транзакция қилишини тақиқлайди ва уларнинг АҚШ юрисдикциясига тегишли бўлган ҳар қандай активларини музлатиб қўйилишини англатади.

Россия бош вазири Михаил Мишустин, Хавфсизлик кенгаши раиси ўринбосари Дмитрий Медведев, президент Путиннинг қизлари, ташқи ишлар вазири Сергей Лавровнинг турмуш ўртоғи ва қизи, Россия хавфсизлик кенгаши аъзолари ҳам санкцияга тушган.

Шунингдек, қуйидаги амалдорларга ҳам санкциялар қўлланади:

  • Александр Беглов — Санкт-Петербург губернатори;
  • Сергей Собянин — Москва мэри;
  • Владимир Булавин — Россия божхона федерал хизмати раҳбари ;
  • Юрий Чайка — Россия президентининг Шимолий Кавказ округидаги доимий вакили;
  • Антон Вайно — Россия президенти администрацияси раҳбари;
  • Константин Чуйченко— Россия адлия вазири ;
  • Александр Гуцан — Россия президентининг Шимоли-ғарбий федерал округдаги доимий вакили;
  • Антон Силуанов — Россия молия вазири;
  • Рашид Нургалиев — Россия хавфсизлик кенгаши котибининг ўринбосари;
  • Юрий Трутнев — Россия бош вазирининг ўринбосари;
  • Игорь Комаров — Россия президентининг Приволжск федерал округидаги доимий вакили.

«Бу шахслар рус халқи ҳисобига бойиб кетишди. Улардан баъзилари Путиннинг Украинага қарши урушини қўллаб-қувватлаш учун жавобгардир. Бу ҳаракат уларни АҚШ молия тизимидан узиб қўйилишини ва Қўшма Штатлардаги барча активларини музлатиб қўйишни билдиради», — дейилади Оқ уй хабарида.

Бундан ташқари, АҚШ Ғазначилиги Россия ташқи қарзини АҚШ юрисдикциясида жойлашган ҳисобрақамлардан тўлашни тақиқлади.

Буюк Британия санкциялари

АҚШдан кейин Буюк Британия ҳам Россияга нисбатан янги санкцияларни эълон қилди. Бу ҳақда мамлакат ҳукумати сайтида эълон қилинди.

Ушбу санкцияларга кўра, қуйидаги шахсларнинг активлари музлатилади:

  • Леонид Михельсон («Новатэк»),
  • Сергей Иванов («Алроса»),
  • Александр Дюков («Газпром нефть»),
  • Андрей Акимов («Газпромбанк»),
  • Андрей Гурьев — каттаси («Фосагро»),
  • Вячеслав Кантор («Акрон»),
  • Сергей Когогин (Камаз),
  • Борис Ротенберг (бизнесмен Борис Ротенбергнинг ўғли).

Уларнинг деярли барчасига (Кантордан ташқари) Буюк Британияга кириш тақиқланди. Гурьев ва Михелсонга транспорт санкцияларига тортилди (уларнинг кемалари ва самолётларининг Буюк Британиягага кириши тақиқланди).

Яна Москва кредит банки биринчи марта санкциялар остида қолди. Ушбу ташкилотнинг активлари музлатиб қўйилади. Шу билан бирга, «Сбербанк"ка нисбатан чекловлар кучайтирилди.

Буюк Британия Россияга нефтни қайта ишлаш ускуналарини экспорт қилишга, шунингдек, Россия темир ва пўлат маҳсулотлари импортига эмбарго қўйди. Бундан ташқари, Ташқи ишлар вазирлиги Россия лойиҳаларига сармоя киритишни тақиқлади. Мамлакат 2022 йил охирига қадар Россиядан кўмир импортини тўхтатади.

Бу Украинадаги ҳарбий амалиётга жавобан Буюк Британиянинг Россияга қарши санкцияларининг бешинчи пакети ҳисобланади.

Аввалроқ, АҚШ Алишер Усмонов ва россиялик бошқа тадбиркорларга қарши санкциялар жорий қилганди.

Эслатиб ўтамиз, бундан олдин Европа ва АҚШ Россияга нисбатан янги «қаттиқ молиявий санкциялар» қўллашга келишиб олгани ҳақида ёзган эдик.