Украина Буча кўчаларидаги тинч аҳолининг жасадлари март ойининг ўрталарида, яъни рус қўшинлари шаҳардан олиб чиқилишидан олдин у ерда бўлган. The New York Times нашри журналистлари шундай хулосага келишди.
Америка газетаси кўчаларда ўнлаб тинч аҳолининг жасади топилган Бучадан сунъий йўлдош тасвирларини эълон қилди. Журналистлар Maxar Technologies томонидан март ойи ўрталарида олинган суратларни таҳлил қилиб, аҳоли уч ҳафтадан кўпроқ вақт олдин, шаҳар ҳали ҳам Россия ҳарбийлари назорати остида бўлган пайтда ўлдирилган, деган хулосага келишди.
Манба: Kievskiy Dvizh via Instagram / Maxar Technologies.
Хусусан, 9 дан 11 мартгача бўлган вақт оралиғида Яблонская кўчасидаги суратларда уч ҳафта давомида ўз жойида қолган камида 11 та ўлчамдаги одам танасидек қора рангдаги объектлар пайдо бўлди. Уларнинг позициялари 2 апрель куни Украина ҳарбийлари томонидан олинган видеодаги одамларнинг жасадлариники билан мос келган.
The New York Times Яблонскаяда олинган яна бир видеони сунъий йўлдош тасвирлари билан солиштирди, унда учта одамнинг жасадини кўриш мумкин, улардан бири велосипед ёнида, иккинчиси — ташлаб кетилган машина ёнида. Журналистларнинг сўзларига кўра, 20−21 март кунлари кўчада ташлаб кетилган машиналар ва яқин-атрофдаги жасад пайдо бўлган.
Киев чеккасидаги Буча шаҳрида тинч аҳоли қирғин қилингани 2 апрель куни, россиялик ҳарбийлар олиб чиқиб кетилгандан сўнг украиналик ҳарбийлар карвони шаҳарга етиб келганида маълум бўлди. Украина президенти Владимир Зеленский маҳаллий аҳолининг ўлимида россиялик аскарларни айблади ва ҳалок бўлган аҳолининг фотосуратларини чоп этди.
Россия Мудофаа вазирлиги фотосуратлар ва видеолавҳаларни «навбатдаги провокация» ва «Ғарб ОАВлари учун саҳналаштириш» деб атади ва «посёлка Россия қуролли кучлари назорати остида бўлган даврда бирорта ҳам маҳаллий аҳоли қандай зўравонлик ҳаракатларидан жабр кўрмаганини айтди». Вазирлик, шунингдек, 30 март куни рус бўлинмалари Бучадан бутунлай чиқиб кетганини маълум қилди.
