Хоразм вилоятининг Янгибозор туманида ноқонуний крипто-активлар майнинги фаолияти билан шуғулланаётган шахслар аниқланди. Бу Бош прокуратура ҳузуридаги Иқтисодий жиноятларга қарши курашиш департаментининг Янгибозор туман бўлими ДХХ ва ИИБ билан ҳамкорликда ўтказган тезкор тадбирда маълум бўлди.
Янгибозорлик фуқаро У.Қ. ўзининг хонадонида 8 та компьютерни ўрнатиб 372 кун давомида ноқонуний крипто-активлар майнинги фаолиятини юритиб келган. Бунинг учун ўзбошимчалик билан ҳисоблагичдан ташқари электр тармоғига уланиб олган. Натижада Электр тармоқлари корхонаси (ЭТК) манфаатларига 112,7 млн сўм зарар етказган.
Фото: Иқтисодий жиноятларга қарши кураш департаменти
Туманнинг бошқа ҳудудида яшовчи яна бир фуқаро К.Қ. ўзининг хонадонида ўзбошимчалик билан электр тармоғига уланиб, 25 та компьютерни ўрнатган. Ундан 198 кун давомида ноқонуний крипто-активлар майнинги бўйича ишлатиб, ЭТК манфаатларига 122,4 млн сўм зарар келтирган.
Фото: Иқтисодий жиноятларга қарши кураш департаменти
Ҳозирда мазкур ҳолатлар юзасидан Жиноят кодексининг 185−2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилди. Улар БҲМнинг 25−75 бараваригача миқдорда жарима тўлаши ёки 240 соатгача мажбурий жамоат ишлари ёки 1 йилгача ахлоқ тузатиш ишлари билан жазоланиши мумкин.
Тергов давом этмоқда.
Аввал ҳам Сирдарёнинг икки ҳудудида ноқонуний майнинг ферма фаолияти фош бўлган эди. Вилоятнинг Боёвут туманида хорижий корхона ва маҳаллий МЖЧ биргаликда қуён етиштириш ниқоби остида ноқонуний майнинг ферма очиб, $7,7 млнлик криптовалюта ишлаб чиқаргани аниқланди.
Ховос туманида эса Корея ва Ўзбекистон фуқаролари бўлган 3 нафар гумондор 9,2 млрд сўмлик 3529 дона компьютер қурилмасидан ва 265,2 млн сўмлик электр энергиядан қонунга зид равишда фойдаланиб келгани айтилганди.
