Озарбайжоннинг Боку шаҳрида бўлиб ўтган спорт гимнастикаси бўйича жаҳон кубоги финал босқичида Оксана Чусовитина олтин медални қўлга киритди. Бу ҳақда Миллий олимпия қўмитаси матбуот хизмати хабар берди.
Ўзбекистонлик гимнастикачи мусобақада 13,266 балл тўплаган ҳолда ғолибликни қўлга киритди. Кумуш медаль Ченге Мария Бачкай (Венгрия), бронза медаль эса Теэ Белак (Словения)га насиб этди.
Аввалроқ, Оксана Чусовитина Қоҳира (Миср)да ўтган Жаҳон кубогининг 3-босқичида спортчи кумуш медалга лойиқ кўрилганди.
2-босқич натижалари:
1-ўрин: Тиаза Кисселеф (Словения) — 13.18
2-ўрин: Оксана Чусовитина (Ўзбекистон) — 12.95
3-ўрин: Лаури Деноми (Канада) — 12.85.
Оксана Қоҳирада Чусовитина кумуш медални қўлга киритгандан сўнг. Фото: МОҚ
Оксана Чусовитина 4 март куни Доҳада (Қатар) ўтказилган спорт гимнастикаси бўйича Жаҳон кубогининг лицензион босқичида ҳам олтин медални қўлга киритди.
Оксана Чусовитинанинг Жаҳон кубогининг лицензион босқичидаги иштироки. Фото: FIG / Twitter
Жаҳон кубогидаги умумий иккита олтин ва битта кумуш медали эвазига ўзбекистонлик гимнастикачи таяниб сакраш дастурида аёллар ўртасида мутлақ ғолиб бўлди.
Эслатиб ўтамиз, 25 июль куни Оксана Чусовитина Токиода бўлиб ўтган ёзги Олимпия ўйинларида саккизинчи бор иштирок этиб, рекорд қайд этган ва карьерасини якунлашини маълум қилган эди. У ушбу режасини 2019 йил октябрдаёқ маълум қилган эди. Бироқ сентябрь охирида у спортга қайтишини маълум қилди. У келаси йил ўтказиладиган Осиё ўйинларида қатнашиш ниятидалигини билдириб, «Мен, шунчаки, фаолиятимни Ўзбекистон учун медалсиз якунлай олмайман», — деди.
Оксана Чусовитина 1975 йил 19 июнь куни Бухоро шаҳрида туғилган. Успорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасини ўрганиб келган. 1990 йил терма жамоа аъзосига айланган. Оксана Чусовитина спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020) ҳисобланади. 1992 йил Барселонада ўтган Олимпия ўйинлари олтин медали соҳибаси, 3 карра Жаҳон чемпиони.
