1 апрель куни БМТ Инсон ҳуқуқлари бўйича Олий комиссари бошқармаси Украинада тинч аҳоли орасидаги йўқотишлар тўғрисидаги ҳисоботини эълон қилди.
Унга кўра, Россия Ферерацияси Қуролли кучлари Украинага ҳужум қилган 24 февраль соат 4:00 дан бошлаб 31 мартга қадар мамлакатда 3257 та ҳолатда одамлар ўлими ёки жароҳатланиши қайд этилган.
Шундан:
- Жами 1276 нафар фуқаро ҳалок бўлган — уларнинг 260 нафари эркаклар, 184 нафари аёллар, 18 нафари қизлар ва 36 нафари ўғил болаларни ташкил қилмоқда, шунингдек, 61 нафар болакай ва 717 нафар катталарнинг жинси ҳозирча аниқланмаган.
- Жами 1981 нафар фуқаро жароҳатланган — 228 нафари эркаклар, 174 нафари аёллар, 38 нафари қизлар ва 34 нафари ўғил болалардан иборат, қолаверса, 88 нафар болакай ва 1419 нафар катталарнинг жинси ҳозирча аниқланмаган.
1443 та ҳолатда Донец ва Луганскда — 425 киши ҳалок бўлган ва 1018 киши жароҳат олган:
- Ҳукумат томонидан назорат қилинаётган ҳудудда: 1130 та ҳолатда 358 киши ҳалок бўлган ва 772 киши жароҳатланган.
- Ўзини мустақил деб эълон қилган (Донец ва Луганск) республикалар назорат қилаётган ҳудудда: 313 та ҳолатда 67 киши ҳалок бўлган ва 246 киши жароҳатланган.
1814 та ҳолатда Украинанинг ҳукумат назоратидаги бошқа ҳудудларида (Киев шаҳри ҳамда Черкасс, Черниговск, Харьков, Херсон, Киев вилояти, Николаевск, Одесса, Сумск, Запорожье, Днепропетровск ва Житомир вилоятларида) 851 киши вафот этган ва 963 киши жароҳатланган.
Фото: t.me/V_Zelenskiy_official.
Бундан ташқари, Олий комиссар бошқармаси Украина бош прокурорининг 1 апрель маҳаллий (Украина) вақт билан соат 8:00 даги маълумотига кўра, 153 нафар болакай ҳалок бўлгани ва 245 нафар бола жароҳат олганини қўшимча қилди.
Тинч аҳоли орасида қайт этилган ўлимлар ва жароҳатланишларнинг асосий қисми кенг кўламли қирғин майдонига эга портловчи қуроллардан фойдаланиш, шу жумладан, оғир артиллерия ва кўплаб ракета тизимларидан ўққа тутиш, қолаверса, ракета ва ҳаво зарбалари оқибатида содир бўлган, дейилади баёнотда.
БМТ Инсон ҳуқуқлари бўйича Олий комиссари бошқармасининг фикрича, қурбонлар сони, айниқса, ҳукумат назорати остидаги ҳудудларда кўпроқ бўлиши мумкин. Сўнгги кунларда жанговар ҳаракатлар кетаётган жойлардан олинган маълумотлар кечикмоқда ва кўплаб хабарлар ҳали ҳам тасдиқланишини кутмоқда.
Аввалроқ, БМТ 24 февралдан 20 мартгача Украинадаги урушда 925 нафар тинч аҳоли ҳалок бўлгани ва 1496 киши яраланганини маълум қилганди.
