29 март куни Самарқанднинг Спитамен кўчасида жойлашган Самарқанд Давлат университети ётоқхонасининг 9-қаватидан мазкур ОТМ талабаси бўлган қиз ўзини ташлаб юборди. Бу ҳақда Zamon информацион дастурида эълон қилинди.
Олий ва ўрта махсус таълим вазирлигининг «Газета.uz»га аниқлик киритишича, қиз воқеа жойида ҳаётдан кўз юмган. У университетнинг кечки таълим шаклида иккинчи босқичида таҳсил олган.
СамДУнинг ёшлар масалалари бўйича биринчи проректори Шаҳзода Негматова қизнинг ОТМ ўқитувчилари ва талабалари билан ҳеч қандай низоли вазияти бўлмаганини маълум қилди.
«Қизимиз тарбияли, оғир-босиқ, фақат озгина журъатсизроқ бўлган. Ўқишга қизиққан. Ҳозир талабаларга ишлашга имкон берилган бўлса-да, у «йўқ, мен аввал яхши билим олишим керак» деган позицияни тутган қизларимиздан бўлган. Ҳар битта курсдоши билан, хонадоши, ўқитувчилари билан гаплашдик, ҳеч ким билан ҳеч қандай «конфликт"и йўқ бўлган», — деди у.
Қайд этилишича, қиз ётоқхонанинг 6-қаватида яшаган, аммо у 9-қаватга чиқиб ўзини ташлаган. Ҳодиса ҳамма уйқуда вақтида содир бўлган. Ётоқхонада яшовчиларнинг аксарияти ҳодиса ҳақида ички ишлар ходимлари келганидан кейин хабар топганини таъкидлади.
«Соат ўн яримгача дарсларимни қилдим, ўн яримда хонодашим чироқни ўчирди. Оқшом соат аниқ нечалигини билмайман, коридорда жуда қаттиқ шовқин эшитилди», — дея эслайди қизнинг хонадоши.
Қизнинг дугоналаридан бири «у сўнгги вақтларда жуда тушкун кайфиятда бўлган"лигини айтди.
Хозирда ҳолат юзасидан ҳуқуқни муҳофаза қилувчи органлар томонидан суриштирув ишлари олиб борилмоқда.
