2022 йилги футбол бўйича Жаҳон чемпионатига чиқиш учун бу ҳафта турли қитъаларда саралаш ўйинларининг навбатдаги ўйинлари бўлиб ўтди. Ҳозирча Қатарга борадиган 32 та терма жамоадан 27 тасининг номи аниқ.
Европа
Саралаш ўйинлари якунида Швеция Польшага қарши ўйинда ютқазиб қўйди — 2:0. Польшадаги Silesian Stadium стадионида ўтган ўйинда Роберт Левандовски пенальтидан гол киритган бўлса, унинг жамоадоши Зелиньский ҳисобни 2:0 га етказди.
Португалия ўз уйида Шимолий Македонияни қабул қилди ва Роналду бошчилигидаги жамоа ҳам 2:0 натижа билан ғалаба қозонди. Голларнинг иккаласига ҳам Бруну Фернандеш муаллифлик қилди. Шу тарзда Португалия ўз тарихида 6-бор кетма-кет Жаҳон чемпионатига чиқмоқда.
Фото: 90MIN
Фото: The Guardian
Африка
Африка қитъасида 29 март куни ЖЧга борадиган бешта терма жамоа номи аниқ бўлди. Саралашнинг сўнгги босқичида Африка кубоги финали иштирокчилари, «Ливерпуль» юлдузлари Муҳаммад Салоҳ (Миср) ва Садио Манэ (Сенегал) терма жамоалари ўзаро тўқнаш келди. 4-дақиқада Хамди Фатхи ўз жамоасига автогол киритиб қўйди. Аввалги ўйинда Миср 1:0 ҳисобида ғалаба қозонганди. Пенальтилар сериясида Сенегал учта гол киритиб, ғолиб бўлди (3:1).
Сенегал терма жамоаси play-off босқичидан сўнг. Фото: Taiwan News
Нигерия терма жамоаси Гана билан дуранг ўйнади (1:1) ва рақибнинг меҳмондаги учрашувда урган голи сабаб Қатардаги турнирга чиқа олмади. Биринчи ўйин 0:0 ҳисобида якунланганди. Ўйиндан сўнг мухлислар Абужадаги «Миллий» стадион майдонига югуриб чиқишди ва қўлга тушган нарсаларни, хусусан, шишаларни улоқтира бошлашди. Ҳуқуқ-тартибот идоралари ходимлари мухлисларга тўқмоқлар билан ҳужум қила бошлаган ва мухлисларни тинчлантириш учун кўздан ёш оқизувчи газ ҳам қўллаган. Нигериянинг уй учрашувига 60 минг нафаргача томошабин келиши кутилганди. Нигерияликлар 2006 йилдан бери илк бор жаҳон чемпионатини ўтказиб юборадиган бўлди.
Нигерия — Гана учрашувидан сўнг майдоннинг аҳволи. Фото: Sports.ru
Жазоир эса Камерунга мағлуб бўлди. Биринчи учрашувда Жазоир меҳмонда 1:0 ҳисобида ғолиб бўлганди. Жавоб ўйинида Камерун асосий вақтда худди шундай ҳисобда ғалаба қозонди. Қўшимча бўлимларда жазоирлик ҳимоячи Аҳмед Туба 118-дақиқада биринчи бўлиб камерунлик ҳужумчи Карл Токо-Экамби 124-дақиқада гол урди.
Маълумот учун, Камерун терма жамоаси 2014 йилдан бери илк бор жаҳон чемпионатида иштирок этади.
Марокаш терма жамоаси Конго ДР жамоасини йирик ҳисобда (4:1) мағлуб этди. Тунис эса Мали билан учрашувни голсиз якунлади. Аввалги ўйин (1:0) ҳисобига тунисликлар ҳам ЖЧга йўлланмани қўлга киритди.
Марокаш ва Тунис жамоалари жаҳон чемпионатида кетма-кет икки сафардан бери иштирок этмоқда.
Марокаш терма жамоаси. Фото: Getty Images
Жанубий Америка
Мазкур қитъада бўлиб ўтган ЖЧ-2022 саралашининг сўнгги босқичида Перу Парагвайни 2:0 ҳисобида мағлуб этди. Перуликлар турнир жадвалида 5-ўринни эгаллаб, Осиё терма жамоасига қарши финал турнирига чиққани учун плей-оффда ўйнаш ҳуқуқини қўлга киритди.
7 июнь куни Доҳада Осиёдаги саралаш ўйинларида ўз гуруҳларида учинчи ўринни олган терма жамоалар Бирлашган Араб Амирликлари ва Австралия тўқнаш келишади. Бу ўйин ғолиби 13 ёки 14 июнь кунлари Доҳада (Қатар) Перу билан ўйнайди.
1 апрель, жума куни Қатарда ЖЧ-2022 гуруҳларини аниқлаш учун қуръа ташлаш маросими бўлиб ўтади.
