Сирдарё вилоятининг Боёвут туманидаги МЧЖ биносида ноқонуний майнинг ферма фаолият юритаётгани маълум бўлди. Бу ДХХнинг вилояти бўйича бошқармаси ҳамда бошқа мутасадди идора ходимлари томонидан ўтказилган текширувда аниқланган.

Таъкидланишича, Тошкент шаҳрида рўйхатдан ўтган хорижий корхона ушбу жамият биносини 2 йил муддатга ижарага олган.

Компания у ерда 1491 комплект майнинг қурилмалари ҳамда 9280 дона видеокарталардан фойдаланган ҳолда майнинг ферма ташкил этган. Натижада 2020 йилнинг август ойидан буён 7,7 млн АҚШ долларига тенг криптовалюта ишлаб чиқарилган, дейилади хабарда.

Бунинг учун МЧЖ ва хорижий корхона раҳбарлари электр тармоғига уланиш учун туман электр тармоқлари корхонаси билан тузилган шартномада фаолият турига қуёнчилик фермаси ташкил этиш мазмунида сохта маълумотлар киритишгани айтилмоқда.

Фойдаланилган катта ҳажмдаги электр энергияси учун паст нархда тўловни амалга оширишлари натижасида, улар томонидан давлат манфаатларига жуда кўп миқдорда зарар етказилган.

Ҳозирда мазкур ҳолат юзасидан жиноят иши қўзғатилган.

Эслатиб ўтамиз, Сирдарёда аввал ҳам 9,2 млрд сўмлик ноқонуний майнинг-ферма фаолияти фош бўлганди. Август ойида Корея ва Ўзбекистон фуқаролари бўлган 3 нафар гумондор 3529 дона компьютер қурилмасидан ва 265,2 млн сўмлик электр энергиядан қонунга зид равишда фойдаланиб келгани айтилганди.