18 март куни президентнинг «Иқтисодиётда давлат иштирокини янада қисқартириш ва хусусийлаштиришни жадаллаштиришга оид қўшимча чора-тадбирлар тўғрисида»ги қарори [168-сон] қабул қилинди. Бу ҳақда Адлия вазирлигининг Huquqiy axborot Telegram канали маълум қилди.
Қарорга кўра, 2023 йил 1 апрелгача Universal Mobile Systems (MOBIUZ) компаниясини хусусийлаштириш чоралари кўрилади.
Шунингдек, «Ўздонмаҳсулот» АКнинг 25 та дон корхонаси 2022 йил 1 июлгача, қолганлари эса жорий йил якунигача босқичма-босқич савдога чиқарилади.
2022 йил якунигача «Ўзсаноатқурилишбанк» ва «Асакабанк» банкларининг давлат улушлари савдога чиқарилади.
2023 йил 1 июлгача «Халқ банки», «Микрокредитбанк», «Алоқабанк», «Агро банк», «Ўзмиллийбанк» банкларининг акциялари фонд биржаси орқали оммавий жойлаштирилади.
Хусусийлаштиришда бошланғич нархни эълон қилмасдан талабгорларни музокараларга оммавий таклиф қилиш йўли билан сотиш услуби жорий этилади.
Қарор билан оммавий савдолар орқали сотиладиган 1501 та кўчмас мулк объектининг рўйхати тасдиқланди. Рўйхатга Tashkent City боғи ҳам киритилган.
1 апрелдан маҳалладаги ҳоким ёрдамчилари томонидан бўш турган давлат объекти ёки ерлар аниқланиб:
- 2000 квадрат метргача объектлар — ҳоким ёрдамчиларининг онлайн-буюртманомасига асосан тўғридан-тўғри электрон онлайн-аукционга чиқарилади;
- қишлоқ хўжалигига мўлжалланмаган ерлар — Yerelektron тизими орқали юборилган онлайн-буюртманома 3 кунда тегишли идоралар томонидан кўриб чиқилади ва ижобий хулоса бўлганда, 2 ҳафтада онлайн-аукционга чиқарилади;
Вазирлик ва идоралар, ҳокимликларнинг 3 ойдан кўп фойдаланилмасдан бўш турган объектлари уларнинг розилигисиз ижарага бериш ёки сотиш учун савдога чиқарилади.
Эслатиб ўтамиз, ўтган йили октябрь ойида Давлат активларини бошқариш агентлиги Tashkent city ишбилармонлик марказидаги дам олиш ва истироҳат боғини келгусида хусусийлаштириш ва сақлаш (эксплуатация) юзасидан «Мастер план» ишлаб чиқиш учун профессионал ташкилотни танлаб олиш юзасидан танлов эълон қилганди.
Маълумот учун, 2020 йил 17 декабрдан бошлаб Tashkent City боғига кириш пуллик бўлган эди. 2021 йил 14 октябрдан эса бу тартиб бекор қилиниб, боғга кириш бепул бўлди.
