Шу ҳафта турли қитъаларда 2022 йилги футбол бўйича Жаҳон чемпионатига чиқиш учун саралаш ўйинларининг навбатдаги ўйинлари бўлиб ўтди. Ҳозиргача Қатарда бўлиб ўтадиган жаҳон чемпионатида иштирок этадиган 32 та терма жамоадан 19 таси маълум бўлган.
Европа
Европада охирги 3 та йўлланма учун курашаётган терма жамоалар пайшанба куни плей-офф ўйинларининг ярим финал ўйинини ўтказишди.
Фаворитлардан бири деб ҳисобланган Италия терма жамоаси ўз уйида Шимолий Македонияга 1:0 ҳисобида ютқазиб, Қатардаги жаҳон чемпионатидан маҳрум бўлди. Меҳмонларнинг ягона голини ўйиннинг охирида, қўшиб берилган дақиқаларда Александар Трайковски урди.
Италия ўз тарихида биринчи бор иккита кетма-кет жаҳон чемпионатида қатнашмайдиган бўлди. 2018 йилги Россияда ўтган мундиалда ҳам «адзурра» иштирок этмаган.
Бошқа ўйинда Криштиану Роналду сардорлигидаги Португалия терма жамоаси Туркия билан куч синашди ва Отавио, Жота ҳамда Нунешларнинг голлари эвазига 3:1 ҳисобида ғалаба қозонди. Туркияликларнинг ягона голини Йилмаз урди.
Диогу Жота Туркия дарвозасига гол ургандан сўнг. Фото: УЕФА.
Шунингдек, саралашнинг бошқа ўйинларида Швеция Чехия устидан минимал ҳисобда (1:0) ғалаба қозонди. Ғолибларнинг ягона голини қўшимча таймда Квайсон киритди. Уэльс терма жамоаси эса Гарет Бэйлнинг дубли эвазига Австрияни 2:1 ҳисобида мағлуб қилди.
Шотландия ва Украина терма жамоалари ўртасидаги ўйин июнь ойига қолдирилган эди. Россия ўйинлардан четлатилганидан сўнг эса Польша саралаш финалига тўғридан-тўғри йўл олди.
Энди 29 март куни Шимолий Македония Португалия терма жамоасига қарши, Польша Швецияга қарши майдонга тушишади. Ғолиб терма жамоалар жаҳон чемпионатига йўлланмани қўлга киритади. Яна бир жуфтликда Уэльс Шотландия ва Украина ўртасидаги ўйинда ўз рақибининг аниқланишини кутади.
Жанубий Америка
Ушбу қитъадан Қатардаги жаҳон чемпионатида қатнашадиган яна иккита терма жамоанинг номи аниқ бўлди.
Уругвай Перу устидан 1:0 ҳисобида ғалаба қозониб, мундиал йўлланмасини ҳал қилган бўлса, Эквадор Парагвайга 3:1 ҳисобида имкониятни бой берди, лекин яқин таъқибчиларидан ўзиб кетганлиги учун жаҳон чемпионатига йўл олди.
Уругвай терма жамоаси. Фото: КОНМЕБОЛ.
Бошқа ўйинларда, Қатарга йўлланмани ҳал қилиб бўлган Бразилия термаси Чили устидан йирик 4:0 ҳисобида ғалаба қозонди, Колумбия 3:0 ҳисобида Боливияни енгди.
Осиё қитъаси терма жамоасига қарши квалификация ўйинларида қатнашиш имкониятини берувчи 5-ўрин учун Перу, Колумбия ва Чили курашади. Саралашнинг охирги тур ўйинлари Тошкент вақти билан 30 март куни саҳарда бўлиб ўтади.
Шимолий ва Марказий Америка
Мундиалда КОНКАКАФдан тўғридан-тўғри қатанашадиган учта терма жамоа номи ҳали аниқ эмас. Саралаш ўйинлари етакчиси Канада Коста-Рикага 1:0 ҳисобида мағлуб бўлди, бошқа фаворитлар Мексика ва АҚШ ўзаро дуранг ўйнашди.
Коста-Рика ўйинчиси Борхес Канада дарвозасини ишғол қилгандан сўнг. Фото: КОНКАКАФ.
Гуруҳдаги йўлланмалар тақдири 28 ва 31 март кунлари бўлиб ўтадиган турларга боғлиқ. Юқоридаги тўртта жамоадан ташқари Панама ҳам йўлланмаларга даъвогарлигича қолмоқда. Тўртинчи ўрин эгаси ёзда Океания минтақаси терма жамоасига қарши қўшимча йўлланма учун баҳс олиб боради.
Африка
Ушбу қитъадан жаҳон чемпионатида қатнашадиган бешта терма жамоалар номи 25 ва 29 март кунлари бўлиб ўтадиган ўйинлардан кейин маълум бўлади. 10 та терма жамоа жуфтликка бўлиниб, иккитадан ўйин ўтказади ва ўйинлар натижасида ғалаба қозонган терма жамоа мундиалга йўл олади.
Саралашнинг сўнгги босқичида Африка кубоги финали иштирокчилари, «Ливерпуль» юлдузлари Муҳаммад Салоҳ (Миср) ва Садио Манэ (Сенегал) терма жамоалари ўзаро ўйнайди. Шунингдек, Камерун-Жазоир, Гана-Нигерия, Конго ДР-Марокаш, Мали-Тунис жуфтликлари орасида ҳам йўлланма эгалари аниқланади.
Садио Манэ ва Муҳаммад Салоҳ Африка кубоги финалидан сўнг. Фото: ФИФА.
Осиё
Осиё қитъасидаги саралаш ўйинларининг охирги босқичидан ўрин олган 9-тур учрашувларида ҳам икки терма жамоа мундиал йўлланмасини нақд қилди.
Австралия устидан 2:0 ҳисобида ғалаба қозонган Япония темра жамоаси ўз гуруҳида биринчи ўринни эгаллаб, жаҳон чемпионатига чиқди. Саудия Арабистони эса Хитой билан 1:1 ҳисобида дурангга эришиб, ушбу гуруҳда иккинчи ўринни нақд қилиб қўйди ва Қатарга тўғридан-тўғри йўлланмага эга бўлди.
Япония терма жамоаси. Фото: ФИФА.
Бошқа гуруҳда йўлланмаларни аллақачон ҳал қилиб бўлган Жанубий Корея ва Эрон терма жамоалари ўртасидаги ўйинда кореялик футболчилар 2:0 ҳисобида ғалаба қозонди.
Океания
Ушбу минтақада терма жамоалар икки гуруҳга бўлинган ҳолда ўйинларни Қатарда ўтказишмоқда. Гуруҳларда биринчи икки ўринни эгаллаганлар ярим финалга чиқади. 30 март куни Дохада бўлиб ўтадиган финалда минтақа ғолиби аниқ бўлади. Вануату ва Кук ороллари терма жамоаларида коронавирус касалликлари сони ошиб кетганлиги учун, улар мусобақадан чиқиб кетишди.
Ғолиб жамоа ёзда Шимолий ва Марказий Америка минтақасида тўртинчи ўринни эгаллаган жамоага қарши майдонга тушади ва жаҳон чемпионатига қўшимча йўлланма учун баҳс олиб боради. Ушбу минтақада фаворит жамоа ҳар доимгидек Янги Зеландия.
