23 март куни АҚШ Давлат департаментини бошқарган биринчи аёл Мадлен Олбрайт 84 ёшида вафот этди. Бу ҳақда Давлат департаменти хабар берди. Давлат департаменти вакили журналистларга Олбрайт саратон касаллигидан вафот этганини айтган, дейилади BBC хабарида.
Мадлен Олбрайт 1937 йилда Прагада туғилган. 11 ёшида ота-онаси билан АҚШга кўчган ва 1957 йилда Америка фуқаролигини олган. Кейинчалик Колумбия университетида фалсафа доктори даражасини олган. Сиёсий карьерасини АҚШ Демократик партиясида бошлаган, 1978 йилда президент Жимми Картер маъмуриятида Миллий хавфсизлик кенгаши аъзоси этиб тайинланади.
1997−2001 йилларда Билл Клинтоннинг иккинчи президентлик муддати давомида у АҚШ давлат котиби лавозимида ишлаган. Мадлен Олбрайт АҚШнинг НАТОдаги позициясини кучайтириш ва урушдан олдинги даврда Ироққа нисбатан санкциялар сиёсатини қатъийлик билан илгари сурган сиёсатчи сифатида машҳур бўлган.
Кўпчилик Олбрайтни 1999 йилда НАТОнинг собиқ Югославия давлатини бомбардимон қилишига шахсан жавобгар деб ҳисоблайди, ҳаттоки бу ҳаракатлар норасмий равишда «Олбрайт уруши» деб ҳам аталади.
«Мен [Болқондаги ҳарбий операция учун] тўлиқ жавобгарликни ўз зиммамга оламан, — деган эди Олбрайт ўша пайтда, — «чунки биз Милошевич режалаштираётган нарсага қўл қовуштириб туролмаймиз. Инсониятга қарши жиноятлар содир этилаётганини кузата олмаймиз».
Давлат котиби лавозимидан кетган Олбрайт Демократлар партиясида сиёсатчилар ва дипломатларни тайёрлаш билан шуғулланди. 2003−2005 йилларда у Нью-Йорк фонд биржаси директорлар кенгаши аъзоси эди.
2012 йилда Барак Обама собиқ Давлат котибини Болқонда тинчлик ўрнатишдаги саъй-ҳаракатлари учун мамлакатнинг энг олий фуқаролик мукофоти — президентнинг «Озодлик» медали билан тақдирлаган эди.
