18 март куни World Happiness Report 2022, бахтли мамлакатлар рейтингининг янги нашри эълон қилинди. Ўзбекистон ушбу рейтингда 11 поғона пастлаб, 53 ўринни эгаллади.
2022 йилда эълон қилинган рейтинг тадқиқотнинг 10 йиллик юбилей нашри бўлиб, унда 146 мамлакатдаги ҳолат баҳоланди. Рейтингни тузишда аҳоли жон бошига ЯИМ даражаси, умр кўриш давомийлиги, бандлик кафолати ва коррупция даражаси каби кўрсаткичлар ҳисобга олинади. Бундан ташқари, рейтингда мамлакатда фуқаролик эркинликлари, хавфсизлик ва келажакка ишонч ҳисси мавжудлиги, шунингдек оилаларнинг барқарорлиги кўрсаткичлари ҳам инобатга олинади.
Финляндия рейтингда қаторасига бешинчи йил етакчилик қилмоқда. Кучли учликнинг қолган ўринлари ҳам ўзгаришсиз қолди (Дания, Исландия).
Ўзбекистон бахтли мамлакатлар рейтингининг 2017 — 2021 йиллардаги ҳисоботида МДҲ ва Марказий Осиё давлатлари орасида етакчи бўлиб келаётган эди. 2021 йилда Ўзбекистон 42 ўринни эгаллаган бўлса, янгиланган рейтингда Қозоғистон Ўзбекистондан 13 поғона юқорилаб, МДҲ ва Марказий Осиё давлатлари орасида ушбу рейтингда биринчи ўринни эгаллади.
Беш йил давомида Ўзбекистоннинг рейтингдаги позицияси 40 ўрин атрофида шаклланиб турган эди.
Рейтингда АҚШ 16 ўринда, Россия эса 80 ўринда келтирилган.
Рейтингда охирги ўринларни Зимбабве, Ливан ва Афғонистон эгаллаган.
World Happiness Report (Бахтиёрлик тўғрисидаги ҳисобот) БМТнинг барқарор ривожланиш ечимларини излаш бўлими томонидан ҳар йили тузиб келинади. Ушбу ҳисобот ва рейтинг 2012 йилдан бери эълон қилиб борилади.
